Kulis.az Saqif Zeynalın yeni şeirlərini təqdim edir.
***
Tanrının alnıma yazdığı şeir
Oldu qırış-qırış telimin altda.
O sevdanın közü hələ qalıbdı
Qalıbdı bir qalaq külümün altda.
Göylərin qapısın bağlayanda Gün
Mən oldum sevdamın Sibrinə sürgün...
Səni unudacam dediyim o gün
Adını qoymuşdum dilimin altda.
Dəli dağda duman yetim, çən yetim
Saçlarıma sığal çəkən dən yetim
Təpədən dırnağa sevgidən yetim
Bir şair böyütdüm əlimin altda.
***
Bu göz yaşını bu üzdən
Silmək olmur İlahi.
Bu üzlə də sevinib
Gülmək olmur İlahi.
Bir cüt göyərçin kimi
Uçub getdi əllərim...
Bəxtin qara tellərin
Hörmək olmur İlahi.
Bu nəğmə yatmır dilə
Bu ömür də bu ələ...
Yaşamaq olmur belə,
Ölmək olmur İlahi.
