Kütə getdi ömür kündəm – ŞEİRLƏR

Kütə getdi ömür kündəm – <span style="color:red;">ŞEİRLƏR
22 aprel 2017
# 18:00

Kulis.az Ülfət Ziyafətqızının şeirlərini təqdim edir.

Öpdüm

Bu gecə ürəyə dardır qorxular,

Dəlisov duyğular səni arzular.

Tapmır gözlərinə qapı yuxular,

İtirib yolunu yanaqlarında.

Ruhum həsrətinlə eşq davasında,

İçdi öpüşləri od nəfəsindən.

Bu sevgi ürəyin "Sən" havasında

Yol getdi vüsalın soraqlarında.

İçimdə bir eşqin ahın gizlədim,

Gözümün yaşıyla qəlbi közlədim.

Gələn sabahlardan səni gözlədim,

Öpdüm yoxluğunun dodaqlarından...

Tapmıram

Göz yaşlarım gözlərimi yandırır,

Kədər sınmaz qürurumu sındırır,

Bəxt də məndən ayrı gəzir, yan durur,

Çılpaqlaşan ruha bədən tapmıram.

Qara qismət saçlarımda ağardı,

Ağ gündüzü gecələrə apardı.

Bəxt mələyim ölümümü yoğurdu,

Kütə getdi ömür kündəm, tapmıram.

Gec ayıldım, demə ömür yuxuymuş,

Bir varlığı yaşadım ki, yoxuymuş.

Əynimdəki zər paltarım çuxaymış,

Çiyinlərə salım kəfən tapmıram.

Həyatımın adı mənim, özü yox,

Ürək sevdim, külü mənim, közü yox.

Bir yoldayam eşqin ayaq izi yox,

Məzarıma mənlə gedən tapmıram.

# 921 dəfə oxunub

Müəllifin son yazıları

# # #