Kulis.az Seymur Elsevərin “Ən qısa hekayə” müsabiqəsinə göndərdiyi “Son səhnə” (404 işarə) hekayəsini təqdim edir.
Bircə o susmuşdu – Qadını. Evin düz ortasındakı meyitə gözündən yaş çıxmadan, lal-süst baxırdı. İllər boyu açıq-aşkar xəyanətin, gecələr bir otaqda, amma təkcəcə yatmağın acısını dadıb, hey ağlamışdı. Axırda xəstə düşən ərinin qulluğunda kefini sürdükləri yox, bu əzabkeş dayanmışdı: qaşıq-qaşıq yemək yedirib, altını təmizləmişdi. Qadın çox rollar oynamışdı səhnədə, beləcə faciə yaşayan birinin rolunusa həyat ona oynatmışdı. İndi təzim anında duruxub qalmışdı...
