Kulis.az Toğrul Məmmədlinin “Ən qısa hekayə” müsabiqəsinə göndərdiyi “Kin” (334 işarə) hekayəsini təqdim edir.
Siqaret tüstüsüylə dolmuş, nəm qoxulu, balaca emalatxanasına çəkilən Məmmədiyyə əlindəki əhtaclarla var-gəl edirdi. Beş il öncə ona edilmiş həqarəti hələ də unuda bilməmişdi. Keçən bu beş il ərzində hər gecə yuxusunda o ana qayıdıb intiqam aldığını görmüş, bu arzuyla yaşamışdı.
Qurdalandığı qurğunun son boltunu sıxırdı. Dəxi yuxularını gerçəkləşdirə biləcəkdi. Zaman maşını hazır idi.
