Kulis.az Pərviz Əzimovun “Ən qısa hekayə” müsabiqəsinə göndərdiyi “Uşaqlar” (426 işarə) hekayəsini təqdim edir.
Bizdən iki bina o tərəfdə nənəsi ilə yaşayan yetim uşaq avtobusa mindi. 7-8 yaşlarında olardı, dərsdən çıxırdı. Onunla birgə avtobusa çiyini çantalı, analarının əllərindən yapışıb bir-birinə təpik atan məktəb yoldaşları da mindi.
Hava soyuq olduğundan barmaqları qızarmışdı. Əlindəki köhnə kitabı şalvarının toqqasına keçirdi. Qəribə baxışlarla uşaqlara baxdı. Paxıllıq və həsəd hissi var idi baxışlarında. Ancaq o, bilmirdi ki, böyüyəndə hamı - o da, atalı-analı uşaqlar da bədbəxt olacaqlar!
