Oktyabrın 28-də Beynəlxalq Muğam Mərkəzində ARB televiziyası “Aranfilm” Yaradıcılıq Mərkəzinin çəkdiyi “Ölən dünyanın yaddaşı” adlı sənədli filmin təqdimatı olub.

APA-nın məlumatına görə, film Azərbaycan ədəbiyyatının görkəmli nümayəndəsi, Xalq yazıçısı İsmayıl Şıxlıya həsr olunub.

Tədbiri giriş sözü ilə professor Qulu Məhərrəmli açıb. O, Azərbaycan Respublikası Prezidentinin Sərəncamı ilə 2019-cu ildə İsmayıl Şıxlının 100 illik yubileyinin qeyd edildiyini bildirib: "Bu il ərzində bir sıra tədbirlər keçirilib. Belə əlamətdar hadisələrdən biri də "Ölən dünyanın yaddaşı" adlı sənədli filmin çəkilməsidir".

Xalq şairi Sabir Rüstəmxanlı çıxış edərək bu il Azərbaycan ədəbiyyatının çox uca zirvələrindən olan Nəsiminin 650, İsmayıl Şıxlının isə 100 illiyinin qeyd olunduğunu söyləyib: "Bu iki adamın yubileyinin bir ilə düşməsi məncə qanunauyğundur. Çünki Nəsimi insanların qula çevrilib satıldığı dövrdə insanı Allah səviyyəsində görürdüsə, İsmayıl Şıxlı da ötən əsrdə Azərbaycan insanını təxminən o səviyyədə görürdü. İsmayıl Şıxlı çox böyük həyat məktəbi idi. O, çox az adama nəsib olan şərəfli bir ömür yaşamışdı. Bu xalqın dünyası İsmayıl Şıxlılar yaşadıqca var olacaq, yoxsa bu dünyamız da öləcək".

Azərbaycan Jurnalistlər Birliyinin sədri Elçin Şıxlı çıxış edərək qonaqlara təşəkkürünü bildirib.

Sonra filmin yaradıcı heyəti səhnəyə dəvət olunub və heyət adından filmin müəllifi Arif Əliyev çıxış edib.

Daha sonra film təqdim olunub.

Qeyd edək ki, filmin ssenari müəllifi və rejissoru Arif Əliyev, operatorları Rafiq Əliyev və Əminə Həsənli, montajçısı Pərviz Səlimov, icraçı prodüseri Qənirə Qurbanlı, bədii rəhbəri Tahir Tahiroviç, prodüseri İqbal Məmmədəliyevdir.

Filmdə Türkiyədə fəaliyyət göstərən azərbaycanlı aktrisa Nəsrin Cavadzadə rol alıb.

• “Doctor Who”nun ulduzu təcavüzdə ittiham olunur
• Edis saxlanıldı
• Şeyx Əbdül xəstəxanaya yerləşdirildi