İctimai Televiziya və Radio Yayımları Şirkəti ilə Azərbaycan Respublikasının Elm və Təhsil Nazirliyinin birgə təşəbbüsü əsasında hazırlanan “Mən, Lalə, bir də Şerlok Holms 2” çoxseriyalı bədii televiziya filminin ikinci mövsümü ictimaiyyətə təqdim ediləcək.

Kulis.az xəbər verir ki, serialın təqdimat mərasimi aprelin 15-də saat 18:00-da Nizami Kino Mərkəzində keçiriləcək. Tədbirə giriş yalnız dəvətnamə ilə mümkündür.

Layihənin ideya müəllifi Tural Sevdimalı, ssenari müəllifləri isə Tural Sevdimalı və Vüqar Hüseynovdur. Ailəvi, detektiv və komediya janrlarını özündə birləşdirən serial 50 dəqiqəlik 12 seriyadan ibarətdir.

Serialın birinci mövsümündə hadisələr Muradın yay tətilini keçirdiyi kənddə baş verir. Onun kitablarla tanışlığı, xüsusilə Artur Konan Doylun əsərləri vasitəsilə Şerlok Holms obrazının təxəyyülündə canlanması süjetin əsas xəttini təşkil edir. Layihənin əsas ideyası mütaliənin insan həyatında rolunun ön plana çıxarılmasıdır. Eyni zamanda Muradın zəngin təxəyyülü vasitəsilə müxtəlif tarixi və mədəni şəxsiyyətlər canlandırılır ki, bu da layihəyə maarifləndirici məzmun qazandırır. Serial uşaqlar üçün dürüstlük, məsuliyyət, böyüklərə hörmət, ətraf mühitə qayğı və ictimai davranış qaydalarının təbliğini hədəfləyir.

Yeni mövsümdə hadisələr 11 yaşlı Muradın ətrafında cərəyan edir. O, “Əlaçı” bilik yarışmasında qalib olmaq arzusunda olsa da, qaydalara əsasən yarışmada iştirak hüququnu itirir. Bununla belə, Murad Lalənin öz kəndlərini təqdim etməsi üçün ona dəstək göstərir və hazırlıq prosesində fəal iştirak edir. Hadisələrin gedişində uşaqlar arasında rəqabət, dostluq münasibətləri və seçim qarşısında qalmaq kimi mövzular ön plana çıxır. Muradın xəyali dostu olan məşhur detektiv Şerlok Holms bu mövsümdə də ona dəstək olur.

“Mən, Lalə, bir də Şerlok Holms 2” serialı 19 aprel tarixindən etibarən İctimai Televiziya və Radio Yayımları Şirkətinin efirində tamaşaçılara təqdim olunacaq.

• "Mən kitab gördüm, bütün sözləri büllurdan..." - Günün şeiri
• Unudulmuş bir şair – Nabokovun hekayəsi
• Çingiz Hüseynovun əsərləri niyə qadağan olunmuşdu?