Haruki Murakaminin aprel ayında çapdan çıxan yeni romanı “Şəffaf Tsukuru Tasaki və zəvvarlığının bir ili” (“Shikisai wo Motanai Tasaki Tsukuru to Kare no Junrei no Toshi”) elə birinci həftədəcə bir milyon tirajla çap olundu. Bundan sonra böyük uğurlar qazanmasına baxmayaraq ictimaiyyət arasında görünməyi xoşlmayan yazıçı 1995-ci ildən bəri ilk dəfə oxucularının qarşısına çıxdı.
Doğulduğu Kyoto şəhərində keçirilmiş bir seminarda çıxış edən Murakami 2007-ci ildə həyatını itirmiş dostu psixoterapevt və yazar Hayao Kavainin adına təsis olunacaq ədəbiyyat mükafatı haqqında məlumat verib. Seminar üçün yalnız 500 nəfərlik dəvətnamə verilib. Dəvətnamələr püşklə müəyyənləşdirilib və seminar boyu isə çəkilişə icazə verilməyib.
Yeni romanında 36 yaşındakı Tsukuru Tazaki adlı bir dəmiryolu mühəndisinin doğma şəhəri Naqoyaya qayıtmasını və yeni bir həyata başlamaq üçün keçmiş dostları tərəfindən niyə rədd edildiyinin səbəbini öyrənməyə çalışarkən başına gələnləri təsvir edən Murakami belə deyib: “Digər romanlarımda olduğu kimi bir az üstüörtülü yazmaq istədim. Amma bu dəfə “real insanlar”a qarşı böyük bir maraq oyatmağa çalışdım. Xarakterlər olduqları kimi davrandılar və mən də onların davranışlarına müvafiq hərəkət etdim”.
Həvəskar bir marafon qaçışçısı kimi tanınan və “Qaçışdan danışanda nədən danışıram” (“What I Talk About When I Talk About Running”) adlı kitabında da bəhs etdiyi kimi səhərləri yazı yazdıqdan sonra qaçışa çıxan, daha sonra ev işlərini görüb ailəsiylə zamanını keçirən Murakami küçədə gəzərkən tanınmaqdan narahat olduğunu deyir: “Elə hesab edin ki, mən təhlükəli adamam, uzaqdan baxanda heç nə yoxdu, amma yaxınlaşmaq, danışmaq və ya toxunmaq istəsəniz dişləyə bilərəm”.
