Qanun nəşriyyatında yeni kitablar çap olunub. Kulis.Azın məlumatına görə bunlar Nəcib Məhfuzun “Yeni Qahirə”, Mark Levinin “Haradasan?” və Corc Cordağın “İmam Əli” kitablarıdır.

Nəcib Məhfuzun “Qahirə romanları” silsiləsinə daxil olan “Yeni Qahirə” romanı təhsilini yenicə başa vurmuş, gələcəyə ümid və həyəcanla baxan dörd gəncin hekayəsidir. Dördü də istedadlıdır. Dördü də cəmiyyətin “orta təbəqəsi”nə aiddir. Universiteti bitirən gənclər acı bir həqiqətlə üzləşirlər – nazirlikdə onların bilik və istedad baxımından layiq olduğu yerlər artıq tutulmuşdur... Nazirin qohumları tərəfindən.

Roman Misirdə gedən sosial-iqtisadi dəyişiklikləri, şəhərin yenidən tikilib dəyişilməsini deyil, yeni nəslin, yeni ictimai-fəlsəfi baxışların yaranmasını əks etdirir. Romanın baş qəhrəmanı Məhcub Əl-Daim oxucu qarşısında heç bir mənəvi dəyərləri olmayan və yalnız özünü düşünən xudbin bir obraz kimi dayanır. Kitabın tərcüməçisi Hülya Aslanovadır.

Mark Levinin “Hardasan?” kitabında Suzan və Filippin məhəbbətindən bəhs edilir. Kitabın tərcüməçisi Aysel Namazəliyevadır.

“Əlinin İsadan üstün olduğunu deməyə dinim, İsanın Əlidən üstün olduğunu qəbul etməyə isə vicdanım icazə vermir” deməklə Hz. Əliyə çox böyük sevgi bəslədiyini etiraf edən livanlı xristian şair, yazıçı və dramaturq Corc Cordağın “İmam Əli (ə) insan ədalətinin səsi” əsəri dünya müsəlmanları tərəfindən böyük rəğbətlə qarşılanıb. Onun beş cilddən ibarət olan bu əsəri ingilis, fars, urdu və s. dillərə tərcümə edilib.

Kitabın tərcüməçisi Famil Şirvanovdur.

• Damson İdrisdən etiraf: "Bred Pittin üzünə tüpürdüm!"
• Almaxanım: “Kimin toyu daha çoxdur, mənim ya filankəsin?”
• Məşhur aktrisa vəfat etdi