“Azərbaycanfilm”də istehsalı yenicə başa çatmış “Axınla aşağı” bədii filmi 5-12 iyul tarixlərində keçiriləcək Karlovı Varı Beynəlxalq Film Festivalına dəvət olunub.

Kulis.az-ın məlumatına görə “Axınla aşağı” festivalın “East of the West” müsabiqə proqramında yer alıb . Proqrama 12 film daxil edilib. Beləliklə, 10 iyulda Çexiyanın Karlovı Varı şəhərində“Axınla aşağı” filminin dünya premyerası baş tutacaq.

“Axınla aşağı” psixoloji ailə dramıdır. Əsas hadisələr Mingəşevir Olimpiya İdman Mərkəzində cərəyan edir. İdman məşqçisinin ailəsində baş vermiş faciə nəticəsində filmin qəhrəmanı onu əhatə edən insanlara, ümumiyyətlə həyata yeni nəzərlə baxmağa başlayır.

Filmin ssenari müəllifləri Asif Rüstəmov və Otar Pertaxiya, quruluşçu rejissor Asif Rüstəmov, operator Ayxan Salar, bəstəkar Xəyyam Mirzəzadə, icraçı prodüser Nadir Əliyev, baş prodüser Müşfiq Hətəmovdur.

Filmdə baş rolları Namiq Ağayev, Mehriban Zəki, Aleksandra Andjevska və Teymur Məmmədov ifa edirlər.

Festivalın qonaqları sırasında Fanni Ardan, Mel Gibson, Laura Dern, Andrey Zvyagintsev, Asia Arcento olacaqlar.

Karlovı Varı Beynəlxalq Film Festivalı 1956-ci ildən fəaliyyət göstərir və FİAPF tərəfindən akreditə olunmuş “A” səviyyəli 12 festivaldan biridir. Festivalın əsas mükafatı “Büllur Kürə” ən yaxşı bədii filmə verilir.

• SSRİ 22 mindən çox polşalını niyə güllələdi? - Bir faciənin pərdəarxası
• "Qadının üç vəzifəsi var: gözəl olmaq, yaxşı geyinmək və heç vaxt etiraz etməmək" - “Yazıçının qeyd dəftəri” kitabından seçmələr
• Məşhur klassika yenidən böyük ekranda: "Uğultulu təpələr"