Gənc yazar Rüfət Əhmədzadə (Rüfət Səid) AYO-ya üzv oldu. Bununla bağlı gənc yazarın bəyanat yayıb:

"Azərbaycan ədəbiyyatına gəlişimin üzərindən artıq beş il keçib və bu müddət ərizində öz yazdıqlarımla ictimai fikrə təsir göstərməyə, ədəbiyyatımızın irəliyə doğru addımlamasına yardımçı olmağa çalışmışam. Bütün yazarlar kimi məni də, indi ədəbiyyatımızda sürməkdə olan bu durğunluq vəziyyəti narahat edir. Bunun üçün səylərimi daha da gücləndirməyə qərar vermişəm və davamlı olaraq ədəbiyyatımızda, cəmiyyətimizdə baş verən olaylara ictimai münasibətimi ifadə edən yazılar yazmaqdayam.

Mənim enerjim, planlarım, mövqeyim və hədəflərim var. Buna görə də bundan sonra fəaliyyətimi müstəqil yazarların toplaşdığı Azad Yazarlar Ocağında davam etdirməyə qərar verdim.

Bu qurumdan əsas gözləntilərim şəxsi fikirlərimin hörmətlə qarşılanması, ictimai mövqeyimin təşkilat üzvləri tərəfindən dəstəklənməsi və təşkilati məsələlərdə bərabərhüquqluluq prinsipinə əməl olunmasıdır.

AYO-nun güclənməsi və böyük bir təşkilata çevrilməsi üçün, ən əsas da plyuralizmin inkişafı üçün əlindən gələni edəcəyəm. Digər azad ruhlu qələm dostlarımı da bu istiqamətdə səylərimizi birləşdirməyə dəvət edirəm".

Xatırladaq ki, Rüfət Əhmədzadə (Rüfət Səid) "Sən busan" adlı hekayələr və mənsur şeirlər toplusunun, "Adım anonim qalsın" adlı esse və hekayələr kitabının müəllifidir. 2014-cü ildə Kulis.az saytının keçirdiyi "Ən qısa hekayə" müsabiqəsində Rüfət Əhmədzadə üçüncü yerə layiq görülüb, Azadlıq Radiosunun keçirdiyi "Ədəbi Azadlıq-2014" müsabiqəsində isə şeir nominasiyası üzrə birinci yerə çıxıb. Hal-hazırda 28 yaşlı gənc yazar şeir və nəsr yazmaqla yanaşı, tərcüməçi və redaktor kimi də çalışır. Kult.az mədəniyyət və ədəbiyyat portalının redaktorudur.

• Mətanət İsgəndərlinin bacısının evindən külli miqdarda pul oğurlandı
• "Paxıllığa kimsə haqq qazandıra bilərmi?" - "Master və Marqarita"dan bir hissə
• Zərdabinin qızının övladlığa götürdüyü bəstəkar kimdir?