writer1

Şərif Ağayar

Məqalə sayı

521
clock11:48 calendar-gray 12 İyun 2014 view-gray3425 dəfə oxunub
view-gray3425 dəfə oxunub

Zəhləmgetmiş Şəhriyar

Anam şəkil konusunda çox həssasdır. Xüsusən o şəkildə mən varamsa... Hər bizə gələndə fotoları tökür ortalığa. İmkan versən hamısını yığışdırıb aparar. Nədən ki, mən bir az uzaqda qalıram, gec-gec görüşürük.

Günlərin birində yenə gözlərini qıyaraq fotoşəkilləri vərəvürd edirdi. Gördüm, ikisini özü ilə kəndə aparmaq üçün kənara qoydu. Maraqlanıb baxdım ki, bu, Əsəd Cahangir və Şəhriyar del Gerani ilə çəkdirdiyim şəkillərdir.

Tənbəllik etmədən anamdan soruşdum:

- Niyə bu şəkilləri seçdin?

Anam qısa cavab verdi:

- Bu uşaqlar sizə oxşuyur (məni və qardaşlarımı nəzərdə tutur).

Amma məni başqa bir hiss bürümüşdü. Hər iki dostum anasını vaxtsız itirib və hər iki dostumun ana sevgisi heç kiminkinə bənzəmir.

Bunu anama deyincə göz yaşlarına boğuldu.

Əminəm ki, əgər hər iki dostumun anası sağ olsaydı analoji situasiyada onlar da bu fotoları seçərdi.

...Şəhriyarın “Azadlıq” radiosunun keçirdiyi müsabiqədə birinci yerə çıxan hekayəsi (“Bizim olan heç nə”) əslində öz anası haqqındadır. Doğrudur, hekayə bir qızın dilindən nəql olunur və qızın anası xərçəngdən deyil, cüzamdan ölür.

Amma heç bir fərqi yoxdur. İtki itkidir. İllah da o halda ki, həmin itki səni bu cür ağrıdacaq və günlərin birində, Şəhriyar demiş, o ağrı sadəcə bədəninin bir üzvünə çevrilməklə sakitləşəcək.

Bu barədə az-çox söz demək haqqı olan biri kimi deyirəm: Şəhriyarın hekayəsi doğrudan gözəl idi. Dili də, intonasiyası da, üslubu da, müşahidələri də, iki daşın arasına ustalıqla yerləşdirilmiş yumoru da! Nəğmə kimi oxudum bu hekayəni.

Əşşi... aləmdi Şəhriyar! Açığı, birinci dəfə görəndə zəhləm getmişdi. Yekəbaş, özündənrazı, ağıldan qürrey gənc təsiri bağışlamışdı mənə. Sonra gördüm yox, yanılmışam! Özü də kökündən! Bu qıvırcıq elə-belə adam deyil.

Ardınca tale Şəhriyarı qarşısına qoyub üstündə, türkün sözü, rəssam kimi işləməyə başladı. Onun alın yazısı başdangetdi yox, xəttat dəst-xəttilə yazılıb. Düzdür, bu, bir insan üçün ağır ola bilər, amma bir yazıçı üçün lütfdür, inayətdir.

Tanrı hər kəsə ağrılarını sözə çevirə bilmək imkanı vermir. Əgər bu imkanın varsa bütün ağrılara eyvallah!

Bu qabiliyyətinə görə elə bilirəm ki, Şəhriyar mənimçün hər şeydi: oğul, ata, bacıoğlu, dayı, qardaş, əmi, qonşu, əsgər yoldaşı, rumka yoldaşı, türmə dostu, meyxana partnyoru, hətta, bacanaq! Nə olsun ki, hələ də “del Gerani” təxəllüsünün mənasını bilmirəm. Heç bilmək istəmirəm də! Onsuz, mən ona Şəhriyar Goranboylu deyirəm. Amma “Gerani” bir yana, bu “del” yaman maraqlı sözdür. İmkan ola apastrofla yazasan.

Şəhriyarla düşmən də olmaq istəyərəm arada. Bığlarını söyərəm! Çoban papağına oxşayan qıvırcıq saçlarından tutub sürüyərəm! Bu qədər yəni...

Şəhriyar bütün dünyaya anasının sevgi pəncərəsindən baxır. Hətta qız sevəndə də bu pəncərədən sevir. Ayrıldığı və bağlandığı qadınlar bir yana, başqa insanlara, məmləkətə, hətta Allaha münasibətində də bir az anası var. Bu sevgi o qədər böyükdür ki, Tanrı qısqanmır, əksinə onun xoşuna gəlir.

Şəhriyarın ağrıya bələnmiş sevgisinin mükafatı həmişə veriləcək. “Azadlıq” radiosunun şəffaf suveniri bunların ən balacasıdır!

REKLAM

Yazarın digər yazıları

Xəbər lenti

Gevorkovun bacısı qızı ilə sevgili olana azərbaycanlı – Mahir yazır...
10:15 13 İyul 2020
Yazıçımızın hekayəsi Gürcüstan ədəbiyyat portalında
09:30 13 İyul 2020
“Mücrü” jurnalının baş redaktoru: “Ayağım nəşriyyata düşərli olmadı” – Müsahibə
09:00 13 İyul 2020
Xalq artisti koronavirusa yoluxdu
14:28 12 İyul 2020
Qızını ölən qızının həyat yoldaşına verdi, oğlu intihar etdi, nəvəsi güllələndi... – Axundov haqqında inanılmaz faktlar
12:15 12 İyul 2020
Anar özünün ən uğurlu hekayəsini seçdi – Mətn
11:44 12 İyul 2020
190 manatlıq qarpızı təpikləyən yutuber
19:41 11 İyul 2020
Əruz vəznində yazılmış ən gözəl təbiət şeiri - Mətn
17:01 11 İyul 2020
Kəramət Böyükçöl: "Məşhurluğumun arxasında dura bilmirəm" - Video
16:29 11 İyul 2020
Özgə adam - Xəyyam Rəfilinin hekayəsi
15:42 11 İyul 2020
Polşa fondu Bakıda müsabiqə elan etdi
14:51 11 İyul 2020
İcazə verək, insanlar Allahlarıyla dalaşsın
14:07 11 İyul 2020
Qarajda yaşayan Əməkdar artistin ürək parçalayan son sözü - Maraqlı Faktlar
13:15 11 İyul 2020
Məktublarda gizlədilmiş sevgilər - Malik Atilayın yeni şeirləri
12:08 11 İyul 2020
Sadəcə, Şahin
11:18 11 İyul 2020
Orxan Pamuk Qərbə yarınır - Şəhriyar yazır...
10:21 11 İyul 2020
Tofiq azərbaycanlı qızı ləkələyir, rus qızıyla evlənir – Məşhur filmin pərdəarxası
08:59 11 İyul 2020
"Sabir Rüstəmxanlı ilə Sirus Təbrizlini atam bu otaqda barışdırdı" - Sabir Əhmədlinin evindən reportaj
21:01 10 İyul 2020
Türkiyəli aktyor ölümlə təhdid olunur
18:17 10 İyul 2020
Əti, sümüyü var, qanı yoxdur – Həmkarları İlham Əzizi tənqid edir...
17:29 10 İyul 2020