news-inner
clock10:00 calendar-gray 21 May 2011 view-gray895 dəfə oxunub
view-gray895 dəfə oxunub

“Bacım Moskvada dilənir, mənsə burda” - REPORTAJ

Onlar parklarda, metro vaqonlarında, gediş-gəlişin gur olduğu küçələrdə tez-tez rastımıza çıxırlar. İnsanların qarşısında yazıq sifət alıb, əllərini açaraq pul dilənənləri görəndə kimimiz ciblərdə atılıb-düşən qəpiklərdən birini onlara uzadıb sakitcə yoluna davam edir, kimimiz isə acılayıb özündən uzaqlaşdırır.

Onları danışdırmaq, dilənçiliklə bağlı suallar ünvanlamaq və gözlədiyimiz cavabı almaq o qədər də asan deyil. Danışmaq bir yana, şəkillərinin çəkiləcəyini eşitdikləri an “yox, yox” deyib gözdən itirlər.

Dilənçi briqadiri – İlqar

Dəstə ilə dolaşan dilənçi qrupu niyyətimi bilmədən mənə əl açdı. Dostumla mən pul əvəzinə istəyimizi onlara çatdırdıq. Bizi dövrəyə alan qrupun arasında bir nəfər seçilirdi. Bir əlində əski, bir əlində maşın şüşəsi silmək üçün istifadə olunan “göy su” olan İlqar – “dilənçi briqadiri” idi. O, bir az fikirləşəndən sonra dilənçi qızlardan bir-ikisinin danışmasına icazə verdi. Niyə məhz onun icazə verdiyini soruşdum: “Çünki qohumuq. Evdən çıxanda valideynləri uşaqları mənə tapşırır”.

Şəlalə adlı qızcığaz soyuqqanlı tərzdə, özünü itirmədən danışır: “Bərdə kürdlərindənəm. 16 yaşım var, 11 yaşımdan dilənməyə başlamışam. Dilənib anamı saxlayıram. Anamın vəziyyəti o qədər də yaxşı deyil. Atam isə dustaqdır. “Sovetski”də kirayə qalırıq. Bir bacım, bir qardaşım var. Daha çox “Torqovı”da və bulvarda dilənirəm”.

- Qardaşın və bacın da sənin kimi dilənir?

- Bibim bacımı Rusiyaya dilənməyə aparıb. Qardaşım Gəncədə, xalamın yanında yaşayır, universitetdə oxuyur.

- Gündəlik qazancın nə qədər olur?

- 10-12 manat. Sevgililərə, cütlüklərə daha çox yaxınlaşıram. Oğlanlar qızların yanında daha çox əllərini ciblərinə atırlar.

Sərt “əmilər”

Şəlalənin dediklərindən belə çıxır ki, qazandıqları çox zaman heç özlərinə də qismət olmur. Polislər onları yaxalayanda əllərindəki pulun hamısını alırlar:

- Polislərlə demək olar ki, hər gün rastlaşırıq. Ən çox Xətaidəki polis bölməsinə aparırlar. Bölmədə də bizə deyirlər ki, daha dilənməyin. Bizim isə başqa çarəmiz yoxdur. Yığdığımızı alandan sonra bizi bölmədən çıxarıb düzənlikdə atırlar. Evdə də danlanırıq. Valideynlərimizə deyə bilmirik ki, polislər tutmuşdular.

- Baxıram, hamınız uzun don geyinmişsiniz...

- Mənə əyin-başı anam alır. Daha çox rəngli paltarlara üstünlük veririk. Qızlar şalvar geyinə bilməz. Valideynlərim icazə vermir.

Söhbətin “şirin yerində” dilənçilər arasında him-cim başladı: “əmilər gəldi”, “əmilər yaxınlaşır” Sonradan bildik ki, “əmi” dilənçi jarqonunda “polis” deməkdir.

Az sonra yaxınlıqda post-patrul maşını dayanır və “təkərli həbsxana”nın qapısı açılan kimi dilənçilər qaçmağa başlayırlar, ancaq bizə görüş üçün ünvan verirlər. Onlar gözdən itən kimi vəd etdikləri görüş yerinə gedirik.

Təngnəfəs olublar, ünvanlarında bizi gözləyirlər. Deyəsən, bu söhbət onlara bir az əyləncəli gəlir. Amma “briqadir” İlqar Bəsti adlı qızı danışmaq üçün tələsdirir, dəstəni “əmilər”ə yaxalatdırmaq istəmir...

- Adım Bəstidir. 17 yaşım var, 10 yaşından küçələrdə dilənirəm. Qardaşım toyda adam bıçaqlamışdı, onun üstündə indi həbsdədir. Anam xəstədir, ciyərlərinə su yığılıb, müalicə baha olduğu üçün çarəsiz evdə yatır. Yevlaxda dolanmaq çətindir, burda adama gündəlik 2 manat verib “Kubinka”da kirayə qalırıq. Qazancım azı 5 manat, ən çox isə 10-15 manat olur. “Torqovı”da, “Sahil”, bir də Ağır Cinayətlər Məhkəməsinin qarşısında dilənirəm.

- Məhkəmə qarşısında qazanc pis olmur, hə?

- Şəhərin mərkəzinə nisbətdə pis deyil. Məhkəməyə kimlər gəlir?! Əksəri işi darda olan insanlar. Dil tökürəm, alqış deyirəm, yalvarıram, onlar da işlərinin yaxşı olması xatirinə xəsislik etmirlər.

- Normal bir iş tapıb işləyə bilmirsən?

- Bir-iki dəfə işləmişəm. Amma şəxsiyyət vəsiqəm olmadığı üçün işdən çıxartdılar. Həm də üstümüzdə “dilənçi” adı var deyə, kimsə etibar etmir. İşləyən zaman başıma gəlib. Elə indinin özündə də qonşuluqda nəsə itəndə, yaxud oğurlananda günahı bizdə axtarırlar.

“Sən evdə, mən evdə, bəs qazanımız necə qaynasın?!”

Yenicə ailə həyatı quran Bəsti ərinin apreldə əsgəri xidmətə yollandığını deyir:

- Ərim əsgərlikdədir, o getdiyi vaxtdan, iki aya yaxındır yenidən dilənirəm. Amma özünün xəbəri yoxdur. Anam da deyinir ki, daha ailəlisən, dilənmə. Deyirəm, sən evdə, mən evdə, bəs qazanımız necə qaynasın!? Atamı əmim “əvəz edirdi”, bizə maddi cəhətdən köməklik edirdi, amma o da bu yaxınlarda rəhmətə getdi.

Dilənçi qızın bəzək-düzəyinin yerində olması nəzərimizdən qaçmır.

- Harada bəzənirsən? Evdə?..

- Bir-iki yerdə gözəllik salonları var. Qızlar sağ olsunlar, bizi tanıyırlar, insanlıq xətrinə pulsuz makiyaj edirlər. Yaxşı qazancımız olanda pulunu veririk. Taxdığım zinət əşyaları – üzük, sırğa isə anamındır, bəzilərini də qohumlar bağışlayıb.

Küçədən, yoldan ötən oğlanların atmacasından da şikayətlənən Bəsti yanlarındakı uşaqları göstərir. Və deyir ki, artıq dilənçiliyə alışmış azyaşlıların da qisməti bundan yaxşı olmayacaq.

İlqar dəstəni başına yığır. Dəstə Bakı küçələrində gözdən itir. Amma biz buna qədər onların bizə açdıqları əlləri boş qoymuruq, danışan qızların ovuclarına imkanımız çatan qədər pul basırıq. Və arxalarınca aıqış deyirik: “Allah sizi heç vaxt “əmilər”lə üzləşdirməsin!..”



Fotolar: Əhməd MUXTAR

Oxşar xəbərlər

Xəbər lenti

Əruz vəznində yazılmış ən gözəl təbiət şeiri - Mətn
17:01 11 İyul 2020
Kəramət Böyükçöl: "Məşhurluğumun arxasında dura bilmirəm" - Video
16:29 11 İyul 2020
Özgə adam - Xəyyam Rəfilinin hekayəsi
15:42 11 İyul 2020
Polşa fondu Bakıda müsabiqə elan etdi
14:51 11 İyul 2020
İcazə verək, insanlar Allahlarıyla dalaşsın - İlqar Kamil yazır...
14:07 11 İyul 2020
Qarajda yaşayan Əməkdar artistin ürək parçalayan son sözü - Maraqlı Faktlar
13:15 11 İyul 2020
Məktublarda gizlədilmiş sevgilər - Malik Atilayın yeni şeirləri
12:08 11 İyul 2020
Sadəcə, Şahin
11:18 11 İyul 2020
Orxan Pamuk Qərbə yarınır - Şəhriyar yazır...
10:21 11 İyul 2020
Tofiq azərbaycanlı qızı ləkələyir, rus qızıyla evlənir – Məşhur filmin pərdəarxası
08:59 11 İyul 2020
"Sabir Rüstəmxanlı ilə Sirus Təbrizlini atam bu otaqda barışdırdı" - Sabir Əhmədlinin evindən reportaj
21:01 10 İyul 2020
Türkiyəli aktyor ölümlə təhdid olunur
18:17 10 İyul 2020
Əti, sümüyü var, qanı yoxdur – Həmkarları İlham Əzizi tənqid edir...
17:29 10 İyul 2020
Berqmanın filmi əsasında serial çəkilir
16:39 10 İyul 2020
Azərbaycanlı müğənni koronavirusdan sağaldı
15:50 10 İyul 2020
Əliağa Vahidi ölümdən qurtaran dostu - Maraqlı faktlar
15:07 10 İyul 2020
Dördbucaqlı qətl hadisəsi – Əli Şirin Şükürlü yazır
14:20 10 İyul 2020
“Çəkməli pişik” onlayn göstəriləcək
13:39 10 İyul 2020
"Heç yerə çıxarda bilmirik" - Vaqif Bayatlıdan xəbər var
12:52 10 İyul 2020
Süni şöhrətə qaçan gənc şair və Allahın “cangüdənləri” – Sərdar Amin yazır...
12:15 10 İyul 2020