news-inner
clock18:30 calendar-gray 20 May 2020 view-gray1960 dəfə oxunub
view-gray1960 dəfə oxunub

Bu şeirdə bütün qaydaları pozacam, Allah baba - Yeni imza

Kulis.az "Yeni imza" layihəsindən gənc şair El Romanın şeirlərini təqdim edir.

"Adamın bir dəfə on yaşı olur"

Adamın bir dəfə on yaşı olur.
Bir dəfə böyüyür uşaq yaşında.
Bir dəfə vurulur bulaq başında,
Bir dəfə qocalır uşaqlaşanda.

O yaşda nə bilim, nə etməliydim?
Elə bil, ürəyin parası gedir.
Adamın bir dəfə on yaşı olur,
Adamın bir dəfə atası gedir.

Adamın bir dəfə anası ölür.
Nə bilim, qismətim oyuncaq deyil?
Yıxıldım, özüm də dizimdən öpdüm,
Həmin gün anladım, anam sağ deyil.

Həmin gün böyüdüm, elə o gündən
İçimdə yaralar yetişir mənim.
Dodağım torpaqla, əlim kürəklə,
Çiynim tabutlarla sevişir mənim.

And içib haqqına az girməmişəm,
Bununçün içimi üşüdür Allah.
Adamı ömründə cəmi bir dəfə
Yalan and içəndə eşidir Allah.

Əslində, o səni öldürmür, ancaq
Səni həm kor edir, həm də lal edir.
Sağ ikən belinə mindiklərinin
Hamısı haqqını min halal edir.

Adamın bir dəfə on yaşı olur.
Bir dəfə böyüyür uşaq yaşında.
Bir dəfə vurulur bulaq başında,
Bir dəfə qocalır uşaqlaşanda.


"Fideliya"

Salam, Fideliya!
Yaxşı olduğunu bilirəm,
çünki səni mən yaratmışam.
Çünki səni mən sevmişəm.
Düz iyirmi iki il əvvəl,
yəni otuz beş yaşımda,
səni mənə dodağımdan qopan təsadüfi zümzümələr bağışladı.
Sənə qədər düz yeddi nəfər sevdim.
Amma onların hamısını toplasan,
bəlkə bir sən edər, Fideliya.
Əgər sənin anan olsaydım,
ən böyük doğum sancısını səndə çəkdiyim üçün
ən sevimli övladım sən olardın.
Əgər sevgilin olsaydım,
ilk səni tərk edərdim, Fideliya.
Çünki ilk sevdiyini unuda bilərsən,
ancaq ilk tərk etdiyini unuda bilməzsən.
Doğulandan eşidilir deyəsən,
Rekviyemin kobud səsi, Fideliya!
Milyon il də yapışacaq yaxandan
Faciənin badirəsi, Fideliya!
Sol yanımda quş qəfəsi, Fideliya!
Silinməyən xatirəsi, Fideliya!
Mən səni kar qulaqlarıma sırğa edəcəyəm,
sən isə məndən iki yüz il sonra
başqa qulaqlarla sevişəcəksən.
Mən səni səhra dodaqlarıma su edəcəyəm,
sən isə məndən iki yüz il sonra
başqa dodaqlarla öpüşəcəksən.
Və ən çox canımı yandıran şey nədir, bilirsən?
Bir gün qapımı döysən, eşidə bilməyəcəyəm.
Vyana, 26 mart 1827
"Hər kəsin gözünü kor edən eşq
Bethovenin qulağını kar etmişdi..."


"Allah baba"

Məni bircə şeirlik bağışla,
Bu şeirdə bütün qaydaları pozacam, Allah baba.
Məni bircə şeirlik bağışla,
Sonra bildiyim kimi də yazacam, Allah baba.
Gözümün qabağında uşaqlaşan,
Dərdimdən qaçıb uzaqlaşan
qızın xətrinə bağışla məni.
Çirkin ürəyimə rəğmən mənimlə qucaqlaşan
qızın xətrinə bağışla məni.
Çünki,
O məni allah bilib ucaltdı,
Mən onu allah bilib qocaltdım.
Əzbər bilirəm uşaqlıqda etdiyim bütün günahları-
Məsələn, qarışqaları qəsdən öldürürdüm həmişə,
Bir dəfə də səhvən donuz əti yemişəm.
Həyata bu yalanlarla qarışmışıq, Allah baba.
Biz anamla həmişə bir-birimizə
yalan danışmışıq, Allah baba;
Mən atam üçün darıxdığımı deyirdim,
O da atamın gələcəyini.
Nə mən atam üçün darıxırdım,
Nə də atam gələcəkdi.
Günahlarım o qədər böyükdü ki,
ancaq səninlə müqayisə edə bilirəm, Allah baba.
Və beləcə gecəyə çevrilirdi sabahlarım.
Allah baba, sən daha böyüksən, yoxsa günahlarım?
Hərdən özüm "ah" dedim,
Hərdən də "ah" deyənə günah dedim.
Böyüdükcə böyüklərə də böyük gözüylə baxdım;
Aydın əmimə Aydın,
Sevil xalama Sevil,
Allah babaya Allah dedim.
Böyüdükcə dilim də uzandı-
Məni də lal elə, Allah baba.
Mən hələ də yalandan and içəndə
"Allah haqqı" deyirəm.
Haqqını halal elə, Allah baba.


"Yanvar"

(Məlik Cahanın əziz xatirəsinə"


Yanvar elə gələ ki,
Birinci həftəsində gözlərin açıq qala,
İkinci həftəsində hər şey yarımçıq qala.
Daşıyır öz içində on bir ayın qəmini.
Yüz qırx yeddi şəhidin, bir şairin qənimi.
Həyat da imtahandı, imtahandan çıxasan,
Elə o vaxt son dəfə yumruğunu sıxasan;
Yumruğunun içində ürəyin də sıxıla.
İçindəki ümidlər kağızdan düzəlməyib
üfürəsən, yıxıla.
Dərdini göy dənizlə bölmək üçün gedəsən,
Sən onsuz da ölmüsən, o gün sonuncu dəfə
ölmək üçün gedəsən.
Gedəsən göyə baxan gözünü öldürməyə
Gedəsən qaça-qaça özünü öldürməyə.
Səpələyə dağlara, yola sənin canını,
Dərdin ən yekəsinə sala sənin canını.
Allah da təsadüfən başına bir daş salıb,
İntihara gedəndə ala sənin canını.
Sonra səndən soruşsa, niyə ölmək istədin?
Deyə biləcəksənmi, onsuz da yaşamırdım
deyə ölmək istədim?
Niyə ölmək istədin, soruşanda bir daha,
Nə üzlə danışasan bu dünyanın yalanın
o dünyada Allaha?
Deyəsən ki, yaramı qaşımaq istəyirdim,
Deyəsən ki, hər yükü daşımaq istəyirdim.
O da sözünü kəsib qısa danış deyəndə,
Deyəsən ki, sadəcə yaşamaq istəyirdim.
Yanvar elə gələ ki,
Birinci həftəsində gözlərin açıq qala,
İkinci həftəsində hər şey yarımçıq qala...

"Salam, ana"

Salam, ana, gözlərimdə xəyalın,
Bu axşam da sən tərəfdə ağrı var.
Pəncərəmdə sən sevdiyin çiçəklər,
Radiomda ən sevdiyin mahnı var.

Qoçaq idim, özün məni bilirsən,
Sən gedəli evə əmək vermədim.
İki gündür özüm heç nə yemirəm,
İki gün də itə yemək vermədim.

Yaxınlarda bizi qoyub gedəndən
Uzaqları olmamışdı anamın.
Anaların ayağında cənnət var,
Ayaqları olmamışdı anamın.

Nə qədər ki, nəfəs alıb veririk,
Ümidlərə hələ ölüm yaraşmır.
Bir övlada belə qəmgin yaşamaq,
Bir anaya belə ölüm yaraşmır.

Otağıma ən sevdiyi ətirdən
Vururam ki, bəlkə bir az güləcək.
Balasının yuxusuna gəlməyib
Bir ətirin qoxusuna gələcək?

Salam, ana, gözlərimdə xəyalın,
Bu axşam da sən tərəfdə ağrı var.
Pəncərəmdə sən sevdiyin çiçəklər,
Radiomda ən sevdiyin mahnı var.

news-inner-user

18017 məqalə

Oxşar xəbərlər

Xəbər lenti

Azad medianın yaratdığı totalitarizm – Aqşin yazır...
09:01 25 Fevral 2021
Varisin romanı Özbəkistanda çap olundu - Foto
08:37 25 Fevral 2021
Musiqili Teatr Xocalı haqqında film çəkdi - Video
18:56 24 Fevral 2021
Onu repressiyadan Mirzə İbrahimov xilas etdi – Abdulla Şaiq haqqında maraqlı faktlar
18:12 24 Fevral 2021
Yeni iddia: Kennedini Xruşşov öldürdüb
17:35 24 Fevral 2021
Qar yağanda ortaya çıxan 10 azərbaycanlı tipi
16:50 24 Fevral 2021
Azərbaycanda yeni teatr yaradıldı
16:02 24 Fevral 2021
Puşkin və 44 günlük Vətən müharibəsi – Cavid yazır...
15:13 24 Fevral 2021
Jerar Depardye təcavüzdə günahlandırıldı
14:22 24 Fevral 2021
101 yaşlı şair vəfat etdi
13:38 24 Fevral 2021
Sonuncu qar - Gənc şairin yeni şeiri
12:51 24 Fevral 2021
Ona Bakının Alen Delonu deyirdilər, son filmini çəkib Azərbaycandan getdi... - “Dədə-Qorqud”un Turalı necə Mark Jozef oldu?
12:10 24 Fevral 2021
Hamı bir-birini didməyə hazırdır - Sevda yazır...
11:30 24 Fevral 2021
Xalq artisti Nuranə Nurun sözlərinə mahnı oxuyub - Video
11:01 24 Fevral 2021
Əhmədiyyə Cəbrayılov haqqında sənədli film çəkilir
10:30 24 Fevral 2021
Öz ayaqlarına yıxılır adamlar – Aqşin Yeniseydən Günün şeiri
10:01 24 Fevral 2021
Gənc şair: “Davamlı olaraq qız aldadıram” – Müsahibə
09:02 24 Fevral 2021
Həsən Turabovun qızı: “Ona dedim, atamı sən öldürmüsən” – Müsahibə
21:00 23 Fevral 2021
"Yeni alınma sözlər lüğəti" nəşr olundu
19:35 23 Fevral 2021
"Tıq-tıq xanım" ingilis dilinə tərcümə edildi
18:42 23 Fevral 2021