news-inner
clock14:41 calendar-gray 14 İyun 2019 view-gray742 dəfə oxunub
view-gray742 dəfə oxunub

Qismətdən yeni Hekayə: Yaşıl Puma

Kulis.az Qismət Rüstəmovun yeni "Yaşıl Puma" hekayəsini təqdim edir.

Nömrəm elektron lövhədə göz vurmağa başlayan kimi, irəli keçib boşalan kresloda oturdum. Yaşıl Pumaya elə bu gün sahib olmalıydım! Hesabdan pul çıxarmaq istədiyimi öyrənən qarabuğdayı qız saatına baxdı, təəssüf-sevinc qarışığı bir təbəssümlə dilləndi: “Nahara az qalıb, lütfən nahardan sonra gəlin.” Qızın təəssüfündə müştəriyə ürəyi yandığını göstərmək cəhdi olsa da, sevincində bir azdan başlayacaq lanç fərəhi oynaşırdı. Əlbəttə, nahardan sonra gələcəkdim, Yaşıl Pumanı sabaha qoyası deyildim ki!

İçərişəhərdəki “İnkvizisiya – orta əsr işgəncə alətləri” sərgisini də naharın bitməsini gözlədiyim həmin saatlarda gördüm. Vaxtı öldürmək üçün bundan münasib yer ola bilməzdi.

Üç rəqəmli nömrəm elektron lövhənin maviliyində batıb-çıxmağa başladı, bu dəfə başqa kreslonun müştərisiydim. Sarışın qızın zeytun dənəsi gözləri nahar sonrasının xumarına təslim olmaq istəmirdi. Sənədlərimi verdim, əvvəldən hazırlamışdım, çünki Yaşıl Pumanı tez almaq istəyirdim. Sarışın qız dırnaqlarına qapqara lak çəkilmiş uzunsov barmaqlarıyla klaviaturanı döyəcləyib məlumatlarımı dişlərini ağardan xanalara daxil etməyə başlayanda əməlli-başlı diksindim. Yəqin orta əsrlər olsa, belə dırnaqlara görə bu qıza cadugər deyib işgəncə verərdilər.

Sərgi bitmək bilmirdi.

Yaşıl Puma çox gözəl görünürdü, onu əlimdə tutduğuma inana bilmirdim, bir azdan ayaqlarım da sevinəcəkdi. Satıcı oğlan sırğasını oynadıb fonoqramı qoşdu: “Pumanı nəylə yuyacaqsız?” Çox fikirləşmədən, “əskiylə siləcəm, şotkalayacam” desəm də, qarşı tərəf hazır sözlərlə atəş açmağa davam etdi: “Cəmi 5 manat əlavə ödəməklə, öz qiyməti 10 manat olan, dünyanın bir nömrəli ayaqqabı təmizləyicisi “Best step”i əldə edə bilərsiniz. Köpüyü də özündədir, suyu da, şotkası da. Pumanız həmişə təmizlikdə olacaq...”

Razılaşdım. Sırğa qımışıb Pumanı qutuya qoydu, qapağını örtəndə birdən nəsə yadına düşdü, əyilib aşağı dolabdan bir sellofan çıxardı, səsi qulağımda qamçı kimi şaqqıldadı: “Unutmadan deyim, bu rezin bağcıqları alsanız, hər dəfə ayaqqabınızı bağlamalı olmayacaqsız, bir dəfə bağlayacaqsız, sonrası super rahatlıq! Cəmi 4 manat 50 qəpik əlavə ödəyəcəksiz.” Yaşıl Puma par-par yanırdı, “olsun, olsun” – dedim.

Həyəcanla əlimi gah cibimə salır, gah telefonumla oynayırdım ki, vaxt keçsin, amma bayaqdan məni “sabunlayıb şotkalayan” sonra isə “rezin bağcıqlarla” yüngül işkəncələrdən keçirən Sırğanın beynində təzə cadugər qazanları qaynayır, yeni gilyotinlər qurulurdu: “Son olaraq deyim ki, bu gün axırıncı günü olan bir kampaniyamız var, əgər indicə aldığınız Yaşıl Pumadan bir yox, iki ədəd alsın, üçüncüsü sizə havayı düşür, istəməzsiniz?”

İstəmirdim, ya da istəmək istəmirdim, istəyə dirənməyə çalışırdım, amma hiss edirdim ki, Sırğanın qurduğu cümlənin axırındakı sual işarəsi boğazımdan yapışıb məni nəfəs almağa qoymur. Sualın məngənəsiboğazımı sıxır, məni istəmədiyim şeyi istəməyə məcbur edirdi. Nəfəsim darala-darala, gözlərim bərələ-bərələ ağlımdan “bəlkə də istəyirəm, etiraf etmək lazımdır?” fikri keçdi.

Sırğa atdığın tilovun, qurduğu torun başına fırlanan şikarını səbrlə süzür, kim bilir, bəlkə də ürəyində əvvəlki qurbanlarıyla yeni qurbanı müqayisə edir, xəyalındakı cədvəldə sayrışan rəqəmlərə baxıb öz rekordunu qırmaq istəyirdi.

Yaşıl Pumanın eleqant dizaynı onuəldə etməyə çalışdıqca araya girən təkliflərlə sakral məzmuna bürünür və cəmi bir əl uzaqlıqdakı əlçatmazlığı ağır bir toppuz, kəskin bir qılınc, iti bir xəncər kimi içimi-çölümü didir, məni qan-tər içində qoyurdu.

Qərar verdim: istəyirdim. Biri hara, üçü hara?! Üç də yaxşıdır: ata, oğul, müqəddəs ruh. Deyəsən “kilsə” qalib gəlirdi...

Udqunub cavab verdim: “İstəyirəm, amma üstümdə o qədər pul yoxdur...”

Sırğa tilovu çəkdi, toru yığışdırdı, qəfildən ətrafda rəqqasələr peyda oldu, atəş-fəşanlıq başladı, günahkar təslim olmuşdu, indi bircə sonuncu addımın qırmızı lentini kəsmək qalırdı. Sırğanın ağzı iri bir qayçıya döndü, açılıb-yumulmağa başladı: “Düz bizim dükanla üzbəüz bir neçə bankın ekspress filialları var...”

Boylanıb baxdım: Yeddibaşlı bir əjdaha bütün gözlərini mənə zilləyib baxır, qanlı dodaqlarına yapışdırdığı gülüş smaylikini tərpədirdi... /sim-sim.az/

(2019)

news-inner-user

16503 məqalə

Oxşar xəbərlər

Xəbər lenti

Azərbaycanlı reper qəza keçirtdi
15:41 22 Sentyabr 2020
Nişanlısının yaylığı ilə ölümdən qurtuldu, “vətən xaini” idi Sovet İttifaqı Qəhrəmanı oldu - Fransa prezidentinin Brejnyevdən tələb etdiyi azərbaycanlı
15:02 22 Sentyabr 2020
Şəhid oğlunun fotosu və Beynəlxalq Sülh Günü
14:24 22 Sentyabr 2020
Peterburqda susan Azərbaycan tarı: Onun məzar yerini unutmayın!
13:41 22 Sentyabr 2020
Məmur özbaşınalığından serial çəkilir - Azərbaycanda ilk
12:55 22 Sentyabr 2020
Hərbi təlimə gedən dostlarımızın avtobus pəncərəsindən dedikləri - Sərdar Amin yazır…
12:15 22 Sentyabr 2020
Azərbaycan Kiyevdə etnomədəni festivalda - Foto
11:58 22 Sentyabr 2020
Azərbaycanlı yazıçının kitabı rus dilində nəşr olundu
11:10 22 Sentyabr 2020
Nələr görmür gözümüz, nələr çəkmir başımız? – Günün şeiri
10:36 22 Sentyabr 2020
Stalloneyə ağır itki üz verdi
10:25 22 Sentyabr 2020
Norveçdə Nizami məktəbi fəaliyyətə başlayıb
09:53 22 Sentyabr 2020
Biz tərəflər – Şərif Ağayardan yeni hekayə
09:01 22 Sentyabr 2020
Rejissorumuzun filmi Moskva festivalının əsas proqramında
18:57 21 Sentyabr 2020
Notr-Dam kilsəsinin muzeyi işə başladı
18:34 21 Sentyabr 2020
Ayağı kəsilmiş sevgilisini tərk edən Ceyran – Sara İbrahimin hekayəsi
17:48 21 Sentyabr 2020
Tanınmış bəstəkara ağır itki üz verdi
17:19 21 Sentyabr 2020
Yeni Ceyms Bond kim olacaq?
16:24 21 Sentyabr 2020
Polisi maarifləndirmək lazımdır – Yazarlar şortik qadağasından danışdılar
15:42 21 Sentyabr 2020
Karyerasına atası son qoydu, dostları nankor çıxdı... – Kinomuzun Sərvərindən maraqlı faktlar
15:02 21 Sentyabr 2020
Tanınmış Türk yazıçısının kitabı Azərbaycanda
14:18 21 Sentyabr 2020