news-inner
clock17:12 calendar-gray 30 İyun 2017 view-gray544 dəfə oxunub
view-gray544 dəfə oxunub

Öpdüm çiyinlərindən... – Ulucay Akifdən ŞEİRLƏR

Kulis.az “Yeni imza” layihəsindən Ulucay Akifin şeirlərini təqdim edir.

Sənin körpücük sümüyünə

Xanım,
adının baş hərfini qoydum
digər qadın adlarının üstünə.
İkinin üstünə iki gəlirmiş kimi
sevməyi öyrəndim səndə.

hələ
toxunmamışdı günəş saçlarına,
hələ gəlməmişdi bahar bədəninə.
O gün, toplayıb bütün cəsarətimi,
Tanrıya toxunmaq istədiyim kimi
toxundum əllərinə.

Öpdüm çiyinlərindən,
Öpdüm mələklər toz qondurmasın deyə.
Öpdüm dodaqlarından,
Öpdüm necə ki,
uşaqlar tez dondurmasın yeyər.

Həmin gün
ilk dəfə gördüm məzarımı,
aşiq oldum qəbir yerimə.
Dua etdim tanrıya,
dua etdim,
sənin körpücük sümüklərində
basdırılım deyə.

Qiblə

Qızcığaz,
müqəddəs torpaqlar
qədər əzizdir bədənin mənə.
Sənin körpücük sümüyünə and içirəm,
üzümü bir yerə tutub dua etməliyəmsə,
Sənin olduğun yerlərdir qiblə.

Çarmıxa çəkilmiş İsa kimi,
Çəkdim ruhumu sənin adına.
Bir gün mən də qalxacam,
qalxacam göyün yeddinci qatına.

səni göstərəcəm tanrıya,
elçi düşəcəm müqəddəs ruhuna.
deyəcəm,
"Tanrım,o qız üçün inandım Sənə,
o qız üçün gəldim hüzuruna".

***

Tarlada işləyən oğluna
təndir çörəyi aparan nənədən
başlayır Vətən.

Zəhmətkeş adamlardır
bu ölkənin sərhədlərini
Əllərinin qırışında
qoruyan, gizlədən.

Bizim ölkənin himnidir
nənəsinin yanınca qaçışan
uşaqların gülüşü.

Torpaqda əkdiyimiz ağaclar da,
böyüyür, böyüyür,
axır-əvvəl
quşlar üçün bir Vətənə dönüşür.

Yorğun qadının nəğməsi

Ən böyük üsyandır
bir qadının sükutu.
Yorğun qadınlar
Susmağı seçir,
Susur, susur
və unudur.

Sənin dodaqların
oxuduğun dualardan
daha müqəddəsdir indi.
Barmaqlarının hər birisə
bir Cənnət müjdəçisi...

Bilirəm,
Bu şəhərdə
Xəyanət sevgidən,
Ayrılıqsa göz yaşlarından baha.

Image result for aşk

Eybi yox,
Sən güclü ol!
Barış saçlarınla.
Uzat saçlarını
qaranlıq gecələrə,
Gülüşünü gizlətmə daha.

Ən böyük üsyandır
bir qadının sükutu.
Yorğun qadınlar
Susmağı seçir,
Susur, susur
və unudur.

***

İndi əllərimiz qana bata-bata

Ölkələrin arasından tikanlı məftilləri,

Evlərin arasından hasarları sökməliyik.

İndi dünyanı daha da gözəl etməliyik.

Doyunca içməliyik dostlarımızla

Soyuq qış gecələrində isti çaxırı

Doğru adamlarla sevişməliyik

İsti yay gecələrində hər günün axırı.

Günəş uşaqlığımızdakı rənginə qayıtmalı,

Dənizlər həmişəkindən daha mavi olmalıdı.

Əlimizdəki son mərmiləri də,

dostumuzun toyunda havaya sıxmalıyıq.

***

Günəşə atılan mərmilər

(şəhid analarına ithaf)

Bir güllə dənizə,
bir güllə buluda,
bir güllə də günəşə atın,
gücünüz çatırsa onları da öldürün.
İnsanları öldürməyə nə var ki?

Qaz sobasında çaydan cızıldayır,
"Cəbhə xəttində atəşkəs yenə pozulub,
Atışma nəticəsində bir əsgərimiz şəhid olub,
Allah rəhmət eləsin" - deyir xəbərçi qız.

Anam qulağını dartıb
əli ilə taxtanı tıqqıldadır,
Mənə baxıb əllərini göyə qaldırır.

Qaz sobasında çaydan cızıldayır,
Hövsələsi çatmayanlar kanalı çevirir.
Başqa evdə isə bir şəhid anası
Həmin o çaydanı devirir.

Elə bil çaydana da güllə dəyir.
Qapağı bir tərəfdə, suyu döşəmədə.
Ayaqları yox, ürəyi yanır ananın.
Su buxarlanır,
Çaydan cızıldayır.

Qaz sobasında çaydan cızıldayır...

Depressiya qurbanı

Kaş,
37-də yaşayardım.
Müşfiq kimi,
qurban olardım
repressiyaya...

Təki görməzdim
Üçüncü minilliyi,
Düşməzdim depressiyaya.

Kaş,
Qandallayıb qollarımı,
Çatmamış
Otuz yaşıma,
Bir güllə sıxardılar başıma,
"Atəş!" əmrindən sonra,
Nargin adasında.

***

Uşağam,
Balaca uşaq.
Ona görə bu qədər
səliqəsizdir misralarım,
sözlərimsə bu qədər uzaq.

Sus...
Danışmaq
Ən böyük səhvidir insanlığın.
Bacarsan
Gözlərimdən kədəri sil,
Əllərimdən ayrılığı.

Arzularım
Uçmağı unudub.
Ümidlərimsə iməkləyir.
Bacarsan
Ürəyimdən ağrıları sil
Beynimdən təkliyi...

Uşağam,
Balaca uşaq.
Ona görə bu qədər
səliqəsizdir misralarım,
sözlərimsə bu qədər uzaq.

***

Elə asan görünür ki,
Qalın kəndir, kiçik bir stul.
Hər şey sıfıra qayıdır, yenə artır!
- budur düstur.

Bir tətiyin ucundaca
Boylanır üzünə həyat.
Sən əyrilərdən qaçdıqca,
Gülümsər düzünə həyat.

Çəkildiyin şəkillərdə
Təbəssüm üzdən sürüşür,
Ayaqların çox narahat,
Əllərin əsəbi düşür.

Güzgüdəki əksinlə də
gələ bilmirsən göz-gözə.
Deyəsən orucsan yenə,
dilin dəymir bircə sözə.

Elə asan görünür ki,
Qalın kəndir, kiçik bir stul.
Hər şey sıfıra qayıdır, yenə artır!
- budur düstur.

***

Elm yanılır,
ya da ki, məsafələr...
İsidə bilirsə əgər
deməli
o qədər də uzaqda deyil Günəş!
deməli
o qədər də güclü deyil uzaqlar,
deməli
kimsə uzaqlardan qayıda bilər!

İndi
bu küçələr,
bu şəhər, ölkə
sənin yoxluğunda
boz və bomboşdur.


qızcığaz,
"sevdiklərimin qucağıdır Vətən"
dedimsə əgər
deməli
bizimçün edam da xoşdur,
deməli
bizimçün sürgün də xoşdur.

İndi
bu küçələr,
bu şəhər, ölkə
bizimtək kədərli
və də sərxoşdur

Gülümsə,
eybi yox,
neyləmək olar?
Səndən ayrılmağın
özü də xoşdur.

Elm yanılır,
ya da ki, məsafələr...
İsidə bilirsə əgər
deməli
o qədər də uzaqda deyil Günəş!
deməli
o qədər də güclü deyil uzaqlar,
deməli
kimsə uzaqlardan qayıda bilər!

news-inner-user

19974 məqalə

Oxşar xəbərlər

Xəbər lenti

Britaniya filmi beynəlxalq müsabiqədinin qalibi oldu
18:00 20 Sentyabr 2021
Uşaqları sevməyimizin sirri - Sahib Altay yazır...
17:16 20 Sentyabr 2021
Məmməd Əmin Rəsulzadənin nəvəsinin ölüm anı lentə alınıbmış - İlk dəfə - Video
16:38 20 Sentyabr 2021
Soyuq burnunla toxunursan üzümə - Rasim Qaracadan şeirlər
16:17 20 Sentyabr 2021
Səyyad Əlizadədən xəbər var
15:30 20 Sentyabr 2021
Ölkəmiz Tallində keçirilən festivalda təmsil olunub -Fotolar
15:20 20 Sentyabr 2021
Ramiz, Əkrəm, Seymur... – Oxucular kimi görmək istəyirlər? - Sorğu
14:41 20 Sentyabr 2021
"Emmy" mükafatının qalibləri bəlli olub - Siyahı
13:49 20 Sentyabr 2021
Tanınmış şairin Cıdır düzündə yazdığı şeir – Mətn
13:25 20 Sentyabr 2021
Atasını həbsxanada öldürdülər, haqqında Stalinə məruzə edildi, rus qızlara görə Sofi Loreni rədd etdi - Tolstoyun qohumu olan azərbaycanlı
12:28 20 Sentyabr 2021
Elçin Hüseynbəyli haqqında kitab nəşr olunub
11:27 20 Sentyabr 2021
Qəbrinin üstündə kitab rəfi yaradılan Nərminin hekayəsi
11:00 20 Sentyabr 2021
Çinarənin mahnısı qalmaqal yaratdı - Oğru kimdir?
10:31 20 Sentyabr 2021
Güllü Muradova: “Məni efirdə görüb, deyib, bu qızı alacam” – Müsahibə
09:00 20 Sentyabr 2021
Los Ancelesdə Üzeyir Hacıbəyliyə həsr olunmuş qısa film hazırlanıb - Video
17:00 18 Sentyabr 2021
Üzeyir Hacıbəyovun vida mərasimindən reportaj - Fotolar
16:30 18 Sentyabr 2021
Milli Musiqi Günü ilə bağlı Bakı Musiqi Akademiyasında tədbir keçirilib - Fotolar
15:31 18 Sentyabr 2021
Şuşada ilk dəfə Milli Musiqi Günü keçirilir - Fotolar
14:36 18 Sentyabr 2021
Yaqub Zurufçu xanımından niyə boşanmışdı? - Video
13:30 18 Sentyabr 2021
Mədəniyyət naziri: “Şuşaya onun ruhunu qaytaracağıq”
12:40 18 Sentyabr 2021