Kulis.az Hədiyyə Şəfaqətin yeni şerilərini təqdim edir.

Atamın yatağı

Bu gecə atamın yatağında yatdım...

Köhnə

Quru

İyini itirmiş yatağında

Sahibinin kimliyini itirmiş yatağında...

Başımı yastığına qoydum

Nəfəsin soyuqluğuna...

Ayaqlarımı bətnimə sıxdım - atamızn evimizdəki yoxluğuna,

Körpəm...

Kədər

Kədər

Kədər...

Pəncərədən o üzdə narın qar...

Yığışdırılmamış süfrədə şərab...

Bir az da sərxoşdum, deyəsən

Ağlımın itdiyi yerəcən sayaqladım...

Ağladımmı?

Heç bircə damcı da ağlamadım...

Qapı

Döymə -

Keçməyə bir qapı yox...

...Qapı yox

Heç nə soruşulmaz, cavabsızlıq əbədidir...

Sonsuzluğu

Duy

Azadlığı

Duy -

Danışa bilək...

Qanadlarından ayrılmaya bildikcə kəpənək

Zamanın anlamı yoxdur…

Barmaqlarının ucuyla nəfəsinə toxun

Həyatın...

Azza

...Azza-

Həmişə gülər üzlü, mehriban, yetmiş beş yaşlı qadın -

Öldü...

"Ölmək nədir" - soruşmuşdu qonşudakı qızcığaz bir dəfə ondan,

"Quşa çevrilməkdir" - demişdi...

...Qızcığaz incidi,

Qaşqabağını tökdü -

"Mən ki dünən görmüşdüm onu,

Bu necə ola bilər,

Azza əllərini məndən xəbərsiz nə zaman qanadlarla dəyişdi?"...

Dayanacaqda ölən qadın

Gənc qadın

Elə dayanacaqdaca öldü...

Bir dəstə adamın içində

Su kimi axıb yerə töküldü qadın....

Hərə bir tərəfə çəkildi, hələ heç kim heç nə anlamamışdı...

Sükut...

Sonra haray qopdu

Biri əyilib əlini əlinə aldı qadının, biri başını dizinin üstünə qoydu

Biri nəbzini yoxladı...

Biri ucadan höküməti söydü

Ki

- Cavanında-qocasında ürək qalmayıb...

Biri qışqırdı ki

- Təcili yardıma zəng edin!

- Çəkilin

Çəkilin

Çəkilin!...

Polis camaatı aralamağa çalışdı

- Nə olub burda?

- Görmürsənmi?-yaşlı adam başını yellədi-adam ölüb...

...Telefonunda

Son aradığı nömrəni tapdılar

- Müəllim, siz bu xanımın nəyisiniz?

Hə?

Elə?

Kiçik bir qəza olub, gəlsəniz yaxşı olar, sizi

(filan, filan, filan) ünvanda gözləyirik...

Hə, hə, teatrı keçən kimi, orda...

Yox, yox, narahat olmayın, hər şey yaxşıdır...

Yox...

Özüylə danışmaq istəyirsiniz?...

................................................

....Külək

Papağının altından çıxan qızılı saçlarını oynadırdı,

Bir tutum tel

Dodaqlarına yapışıb qalmışdı...

Gözlərinin dibində bir damla parıltı günəşə ilişib qalmışdı

Qadının...

• "Məqsədim ittiham etmək deyil, sadəcə..." - Arif Quliyevin oğlu Teymur Əmrah haqda danışdı
• Ən məşhur əsərlərini həbsxanada yazan "İspaniya ədəbiyyatının aslanı"
• Kamran Həsənov: "Mediada xarici sözlərin yersiz işlədilməsi gənclərin mənfi təsir edir"