Qan TURALI

İnsan çox şey öyrənir, çox şey bilir.

İstanbula təyyarə biletinin qiymətini, Viyet teoremini, hansı mağazalarda endirim olduğunu, Dostoyevskinin adının Fyodor olduğunu, Facebookda necə bloka salmağı və çıxartmağı…

Bəlkə də bizə heç lazım olmayan bir diplom üçün 15 il oxuyuruq.

Sevirik, evlənirik, toylara gedirik, oğul evləndirib qız köçürdürük.

Amma elə hər birimizin qarşısına bir gün bir adam çıxsa və bizdən soruşsa: “Həyatın mənası nədir?”

Sözləri gəvələyəcəyik, ilk beş dəqiqədə doğru dürüst bir cümlə belə qura bilməyəcəyik.

Hə, sonda düzüb-qoşacağımız fikirdə də bir orijinallıq olmayacaq.

Orijinallığı keçdik, həyati mənanı gerçəkləşdirilməsi yolunda heç nə etmirik, sadəcə yola veririk.

Bu sualı özünüzə verin, çıxan cavabları alt-alta yazın.

Sonra dönüb öz həyatınıza baxın, elə bu günə baxın, bu gün həyatınızın mənasını gerçəkləşdirmək üçün nə etmisiniz?

Biz məqsədə gedən vasitələr içində itib-batırıq, bir azdan məqsədi də unudaraq vasitələr dünyasında vurnuxuruq, ta ki, “o gözəl və böyük sonluq, ölüm” qapımızı döyənə qədər…

Bizim qarşımızda isə ancaq və ancaq bir sual durur: Həyatımızın mənasını tapıb onu gerçəkləşdirmək!