news-inner
clock18:50 calendar-gray 27 Aprel 2015 view-gray237 dəfə oxunub
view-gray237 dəfə oxunub

Üç günəşli adamlar

Kulis bu yaxınlarda 56 yaşını qeyd edən şair ilham Qəhrəmanın yeni şeirlərini təqdim edir.

İlham Qəhrəmanın özü ilə də, sözü ilə də iki min ildir ki, tanışam. Təəccüb etməyin, İlhamı doğrudan da keçən minillikdən tanıyıram. Şeir, müsahibə, tərtibatçılıq kimi müxtəlif janr və sahələrlə bağlı üç kitabına ön söz yazmışam.

İlham milli ənənələrə bağlı şairdir, amma təqlidçi yox, özünəməxsusdur və bununla da göstərir ki, inkarçı olmadan da yenilikçi olmaq, orijinal ruhlu şeirlər yazmaq olar; onun bədii obrazları bəzən ağlagəlməz dərəcədə yenidir, həyatidir və buna görə də yaddaqalandır; poetik dilinin xəlqiliyi baxımından onunla kimisə müqayisə etmək isə ümumən mümkünsüzdür - bu, artıq İlhamın stixiyasıdır; fəlsəfi ümumiləşdirmələrlə incə müşahidə qabiliyyətindən xəbər verən detalçılığın, heca vəzni ilə sərbəst şeirin üzvi sintezi onun şeirlərinin başlıca məzmun və forma özəlliyidir.

Bütün sadaladığım xüsusiyyətləri İlhamın sizə təqdim etdiyim bu son şeirlərində də görürəm. Bu şeirlərində də İlham mövzu ampluası tanımır - sevgi şeirləri də yazır, bəzən kəskin səciyyə alan sosial-siyasi mövzuya da, vətənpərvərlik lirikasına da üz tutur, fəlsəfi düşüncələrə də meyllənir... Amma əvvəlkilərlə müqayisədə bu şeirlərdə bir fərq aydın görünür - səsin amplitudasının maksimum düşməsi. Və bunun öz yerini səssiz düşüncə axarına verməsi. Bu şeirlər, musiqiçilərin diliylə desək, artıq bir gəncin bəzən pərdədən çıxan şaqraq zəngulələri deyil, durub-toxtamış, səsi tam oturuşmuş bir xanəndənin incə boğazlar, ustalıq tələb edən qaynatmalarla şərtlənən mükəmməl, püxtə ifasıdır. Bu şeirlər göstərir ki, Puşkin düz deməyib, nəinki 26, hətta 56 yaşda da şair qalmaq mümkündür.

Yaş söhbətini elə-belə salmadım, dünən - aprelin 24-ü çağdaş Azərbaycan şeirində təkrarsız üslubu və özünəməxsus xarakteri ilə seçilən İlham Qəhrəmanın doğum günü idi. Şair dostuma uğurlar arzu edir, onun ürəkdən gələn duyğularının oxucuların qəlbinə yol tapacağına inanıram.

Əsəd Cahangir

TƏK

Bir düzün ortasında, bitən

ağac kimi təkəm, telli balam...

Mənim təkliyim yerdə

çəkdiyim ahdan,

Göydə Allahdan gəlir,

telli balam.

Kim bilir başıma

nə gəldi, telli balam?!

Təklər bu dünyada

tək əldi, telli balam.

Sevinc göz yaşında boğulur,

Kədərin çiçəyi çırtdayıb,

kədərim gülüşür,

telli balam.

Bütün qəmli mahnılar

təkliyin səsidi,

qəmli mahnılar sümüyümə düşür,

telli balam!

İtsəm məni necə nişan verərsən,

Necə soraq edərsən, telli balam?!

Heç kimin qəlbinə dəyməyən,

qəlbi ipək adamı,

Ürəyi sözə pətək adamı,

Adamların arasında

tək adamı, necə soraq edərsən,

telli balam?!

Təkəm, telli balam, -

tək səbir kimi,

Şamaxı yolundakı

tək qəbir kimi!

Belə tək olan

tək mənəm,

Bu təkliyimlə

görk mənəm, telli balam!

09.11.2014

lll

Canım, telli balam,

Hissim torpaq kimi

Əsirdi, ilhaqdı.

Hər yerdən görünür, -

Mənim yurd həsrətim

Yol kimi çılpaqdı.

17.09.2014

PORTRET

Masanın üstündə,

Əli əlinin üstündə,

Çənəsi əllərinin üstündə,

Pəncərədən uzaq məchul nöqtəyə

gözündə bir sualla baxmaq -

Görəsən nə vaxt?

12.10.2013

YAXŞIDI

Yardan ayrılanda zar-zar ağlayan,

Yarının böyrünü kəsə yaxşıdı.

Bir adam yol ala səfər eyləyə,

Tələsə tez çatsın kəsə yaxşıdı.

Səvabdı şirin söz xalqa dadırmaq,

Günahdı hav günü qıraqda durmaq.

Qələm hüzurunda qulluqda durmaq,

Tanrıdan vergili kəsə yaxşıdı.

Yazda çiçək aça, payız bar tökə,

Allah var tökəndə o ki var tökə...

Axşamdan başlaya narın qar tökə,

Səhər açılanda kəsə yaxşıdı.

05.02.2015

SƏHƏNGDƏKİ QARPIZIN NAĞILI

(uşaqlar üçün)

Körpə vaxtı qış axşamları

Nənəm yığıb uşaqları

Bir şirin nağıl başlardı.

Nağılın yarısında

diqqətimiz üzülər,

bizi mürgü tutardı.

Nənəm tez ortalığa

belə bir söz atardı -

Kim yatsa,

səhəngdəki qarpızı kəsəcəyik...

Qarpızın yuxu dağıtmağına əvəz yox!

Bundan sonra ilan vuran yatardı,

biz yox!

Qarpızın yolunu

gözlədə-gözlədə

Bizə nağıl söylər,

tapmaca satardılar.

Səhəngdəki qarpızı nənəm

özünə şərik qoşardı -

Nağılın mürgüyə qədərini nənəm,

Mürgüdən sonrasını qarpız danışardı.

Nağıllar bitərdi,

Səhəngdəki qarpız kəsilməzdi.

Ümidimiz sabahkı

nağıl axşamına qalardı,

ümidimiz əskilməzdi.

Qışın nağıl gecələri...

Evimizin isti sobası,

Pəncərədən sallanan

sal buz yadıma düşür.

O vaxtdan harda

qarpız görsəm səhəng,

Səhəng görsəm

qarpız yadıma düşür.

Xatirələr boyunbağıdı

Bu gün bir muncuğun bağı qaçıb.

Bir sözlə səhəngdəki qarpız

Bizə çox nağıl danışıb,

Başımıza çox nağıl açıb.

8 Mart 2015

Antalya hava alanı

ÇİÇƏKLƏR

Çiçəklər örüş yeridi,

iş yeridi arılara.

Çiçəklər səhnədi quşlara.

Çiçəklər “sevirəm!” deməkdi

bir bəy əlində.

“Sevilirəm!” deməkdi

bir xanım əlində.

Ən ağır günümüzdə

hamı bizi tərk edər,

Çiçəklər gecəni də

bizimlə qalar qəbrimizdə!

25.03.2015

ARİF ƏMRAHOĞLUNUN XATİRƏSİNƏ

Bu yola vaxtsız buruldun

Niyə belə tez yeridin?!

Ağacın alt budağıydın,

Əlimiz çatan yer idin.

Yığışıb yazarların

Küçəsindən getmisən.

Səni sevən dostların

Kisəsindən getmisən.

Haqqı-salam sənlə idi

Haqqı-salamın itməzdi,

Sucuq yerdən ot yaşılı,

Səndən xoş sifət getməzdi.

Sən ki, orda yaxındasan

Bizdən pıçılda Tanrıya.

Qapın məscid qapısıydı

Açıq olardı hamıya.

Bakının ortasında

hər səni görəndə

Adamı vurardı kəndin ətiri.

Yanına gələni əyləşdirərdin

Qızlara deyərdin bir çay gətirin.

Sən baxan səmtə baxanda

Başda Vətən gəlir, -

Kür, Araz, Həkəri görünür.

Siqareti külqabına qoyub

Aldığın salamın yeri görünür.

...Birər-birər gəzdim bu dağı,

Dərəsi, təpəsi, tapı qalmadı.

Ağac yıxılanda səmtinə aşar

Səndən sonra bizə aşacaq yer,

Açılacaq qapı qalmadı.

06.04.2015

ACI ŞEİRLƏR

SİVİL CƏZA

Cəza cürbəcür olur, telli balam,

Baş üzəni, əl üzəni...

Cəza da var sivildi,

Sadəcə adamı

adam yanında qızardır, telli balam -

Layiq olanın haqqını

layiq olmayana vermək

birincinin yanında

ikinciyə verilən cəzadı, telli balam.

10.03.2015

Sabiha Gökçen

GÜNƏŞİ ÜÇ ADAMLAR

Hər adam sən deyən deyil,

telli balam,

Hər adamın açılacaq qapısı,

dönəcək dönəlgəsi olmur.

Elə adam var,

telli balam,

Sacayaq kimi göydə günəşi üçdü,

yerdə kölgəsi olmur!

11.03.2015

QURBAN YAQUBOĞLUNA

Kim halından halı bilər

Bu halı haldan olmuşun?!

Nə sağı haraya yetər,

Nə solu, soldan olmuşun.

Həsrət sevgi sazağıdı,

Əriməyən buz dağıdı.

Bizim dağlar göz dağıdı.

Yox yolu yoldan olmuşun.

Sel çayda həşir qoparır,

Dalğalar enir, qabarır...

Həm körpünü sel aparır,

Həm salı saldan olmuşun!

18.07.2014

Nabran

525.az

news-inner-user

19946 məqalə

Oxşar xəbərlər

Xəbər lenti

Sevgilisi: "Vüqara yaraşmayan qadınlar qəbrinin üstündə hoqqa verir"
13:01 17 Sentyabr 2021
Narkotikaya qurşandı, cibindən 11 min manat oğurladılar, küçədə ağlaya-ağlaya pul diləndi – Oğlunun faciəsində Səyavuş Aslanın günahı
12:30 17 Sentyabr 2021
Vətənə əbədi köçün mübarək, Yaqub Zurufçu!
11:45 17 Sentyabr 2021
Bakirə qız axtaran debillər
11:10 17 Sentyabr 2021
Bakıda milli kitab sərgisi keçiriləcək – İlk dəfə
10:33 17 Sentyabr 2021
Səyyad Əlizadə Mərkəzi Gömrük hospitalına köçürülüb
09:48 17 Sentyabr 2021
Müəllifi bu mahnıya niyə sahib çıxa bilmir? – Plagiatın qurbanı olan “Bayatılar”ımız
09:00 17 Sentyabr 2021
Ölümünə aktyor, ölümünə inqilabçı... - Bir dahi portreti
21:00 16 Sentyabr 2021
Məşhur Amerika filmi yenidən çəkiləcək
18:51 16 Sentyabr 2021
Azərbaycanlı professor vəfat etdi
18:15 16 Sentyabr 2021
Azərbaycanlı şair: “Hər ay ABŞ-dan mənə pul gəlir” – Müsahibə
17:31 16 Sentyabr 2021
Mədəniyyət Nazirliyi məlumat yaydı - Mətn
17:05 16 Sentyabr 2021
Çingiz Abdullayev şeir oxudu – Fotolar
16:15 16 Sentyabr 2021
Əri qorxusundan onu boşadı, çadrasını Cəfər Cabbarlı açdı, anası qızına görə dinə qarşı üsyan elədi - İlk kinoaktrisamızın ağlagəlməz həyatı
15:28 16 Sentyabr 2021
Millət vəkili Salam Sarvanı təbrik etdi - Foto
14:56 16 Sentyabr 2021
Özbəkistanla müştərək film çəkəcəyik
14:00 16 Sentyabr 2021
Benzinin bahalaşmasına haqq qazandıran millət vəkilləri – Sərdar yazır...
13:15 16 Sentyabr 2021
Səyavuş Aslanın küçədə qalan oğlu ilə bağlı rəsmi açıqlama - Foto
12:24 16 Sentyabr 2021
Acun azərbaycanlı olduğunu açıqladı – Video
12:18 16 Sentyabr 2021
Mübariz İbrahimovun yaxın dostu olmuş taksi sürücüsü: “Hər gün bizim idman zalına gəlirdi” - Maşından reportaj
12:06 16 Sentyabr 2021