Tərəf müqabili ilə sevgi yaşayan, evi olmadığı üçün qarajda qalan, iki dəfə intihara cəhd edən Xalq artisti

Tərəf müqabili ilə sevgi yaşayan, evi olmadığı üçün qarajda qalan, iki dəfə intihara cəhd edən Xalq artisti
28 sentyabr 2023
# 21:00

Bu gün Xalq artisti Əjdər Həmidovun doğum günüdür.
Kulis.az aktyorun həyat və yaradıcılığı haqqında maraqlı faktları təqdim edir.

Əjdər Qüdrət oğlu Həmidov 28 sentyabr 1953-cü ildə Şabran rayonunun Aygünlü kəndində müəllim ailəsində anadan olub. Ailədə iki qardaş, iki bacı olublar.

***

1976-cı ildə atasının istəyini yerinə yetirərək İncəsənət İnstitutunun dram və kino aktyorluğu fakültəsinə daxil olub. Ondan Adil İsgəndərov və Rza Təhmasib imtahan götürüblər.
1979-cu ildə təyinatla Sumqayıt Dövlət Musiqili Dram Teatrına göndərilib. 1990-cı ildə Akademik Milli Dram Teatrının aktyor heyətinə qəbul edilib.

***

Bu illər ərzində "Özümüzü kəsən qılınc", "Burlaxatun", "Bu dünyanın adamları", "Hökmdar və qızı", "Ölülər", "Kaş araba aşmayaydı" tamaşalarında müxtəlif janrlı obrazlar yaradıb.
"Azərbaycanfilm"in istehsal etdiyi "Kişi sözü"ndə Qasım, "Lətifə"də Əhməd, "Hacı Qara"da Kərəməli və başqa rolları onu tamaşaçıların sevimlisinə çevrilib.
2007-ci ildə Azərbaycan Televiziyası ilə nümayiş etdirilən "Yoxlama" adlı çoxseriyalı televiziya filmindəki Müfəttiş obrazı sənətçiyə böyük uğur gətirib.

Əjdər Həmidovun sözlərinə görə, sakit, fağır uşaq olub:
“Uşaqlıqda həddindən artıq sakit, fağır olmuşam. Hətta atam əsəbiləşirdi ki, oğlan uşağı da bu qədər fağır olar? Bir az diribaş, cəld ol. Bir iş dalınca göndəririk, gəlib çıxmırsan. Uşaq hərəkətli, dəcəl olar. Belə sakit uşaq olmaz."

***

Aktyor universiteti çox ağır şəraitdə, çətinliklə başa vurub. Dörd il tələbə yataqxanasında qalıb. Atası xəstə olduğuna görə, ailə ananın maaşı ilə dolanıb. Qardaşının plaşını növbəylə geyiniblər.
Universiteti bitirəndən sonra da onu yataqxanadan çıxarıblar. Beləcə maşın qarajında yaşamağa başlayıb...

Uzun müddətdən sonra, nəbhayət, maaşını yığıb bir otaqlı ev alıb.

Əjdər Həmidov “Kişi sözü” filmindəki Qasım obrazı ilə məşhurlaşıb.
Aktyor filmin əsas qəhrəmanı Qasım kimi böyük və dərin sevgi yaşayıb. O, müsahibələrinin birində bu haqda deyir:
“Elə böyük bir sevgi mənim həyatımda da olub. Amma kinodakı kimi, həyatdakı sevgimdə də uğursuzluqla qarşılaşdım. Məhəbbətimiz filmdəki kimi nakam qurtardı. Çox gözəl bir xanımı 10 ilə yaxın sevdim. Amma bəxtimiz gətirmədi, evlənə bilmədik. Ona görə də mən həmişə deyirəm ki, Qasımla mənim həyatımda oxşarlıq çoxdur. Kinoda Solmaza qarşı keçirdiyim hissləri həyatda da yaşamışam. Filmdə isə Qasımı mən, Solmazı Sənubər İsgəndərli oynayırdı. Rejissor Cahangir Mehdiyev dedi ki, Əjdər, Sənubəri sevməlisən, yoxsa alınmayacaq, təbii olmayacaq. Dedim, sevmək sifarişlədir? Durduğum yerdə necə sevim? Amma etiraf edim ki, qısa müddətdə Sənubəri sevməyə başladım. Onu sevməmək olar? Bizim sevgimiz qısa çəkdi - 3 ay. Film bitən kimi hərə öz yoluna getdi”

***

Əjdər Həmidov həmkarı, Xalq artisti Hicran Nəsirovanın bacısı ilə ailə həyatı qurub. Bu evlilikdən onun iki qız övladı dünyaya gəlib.

Vaqif Mustafayev qrim probleminə görə Əjdər Həmidovu “Yoxlama” filminə təsdiq etməkdə tərəddüd edib. Bir neçə məsləhətləşmədən sonra Əjdər Həmidov bığlarının qırxılmasına, saçlarının boyanmasına razılıq verib. Filmin çəkilişləri çox əziyyətli olub. Moskvadan onu əvəz etmək üçün 3 kaskadyor dəvət olunsa da, ən çətin və qorxulu səhnələri özü yerinə yetirib. İnadkarlığı isə ona baha başa gəlir. Yüksəklikdə çəkilən səhnələrin birində aktyor qorxub stress keçirib, xəstələnir və Bakını tərk edir, iki il rayonda yaşayır. Hətta iki dəfə intihara cəhd edir.

***

2007-ci ildə insult keçirir. Həkimlər ona bir müddət səhnəyə çıxmağı qadağan etsələr də, aktyor teatrsız yaşaya bilməyəcəyin əsas gətirərək təzədən səhnəyə çıxır. Mütəmadi həkim nəzarətində olan aktyorun təzyiqi isə çox vaxt 250-dən aşağı olmurmuş.

Əjdər Həmidov sonralar müsahibələrinin birində filmin çəkilişləri haqqında: “Həmin filmdə elə səhnələr var idi ki, məni maşına sarıyırdılar, maşın da məni sürətlə sürüyürdü. Sonra məni qayadan aşağı atıblar, quyulara düşmüşəm, turbalardan keçmişəm və sairə. Çox xəsarətlər almışam. Demək olar ki, çəkilişlər zamanı mənim bədənimdə sağ-salamat yer olmayıb. Bütün qollarım, ayaqlarım zədələnmişdi, bədənim yaralı idi. Hətta filmdə bir yer var idi, gəminin lyukundan çıxıb qaçmalı idim. Sən demə, lyukun ətrafında kəsilmiş dəmir parçası qalıbmış. Qaçanda həmin dəmir ayağımı kəsib parçaladı. Məni təcili xəstəxanaya gətirib, ayağımı tikdilər” - deyib.

***

Aktyor 30 il tamada kimi fəaliyyət göstərib. Ancaq eyni zamanda filmlərə də çəkilib, tamaşalarda da iştirak edib.

Əjdər Həmidov 2020-ci il noyabr ayının 24-də Kliniki Tibbi Mərkəzdə insultdan vəfat edib.

# 27277 dəfə oxunub

Oxşar xəbərlər

# # #