"APA-Group"a daxil olan xəbər saytlarının vahid mobil tətbiqi hazırlanıb.

APA-nın məlumatına görə, mobil tətbiqdə APA və ONA agentlikləri, Lent.az, vesti.az, Kulis.az, apasport.az saytları və APA TV cəmləşdirilib.

Bütün növ xəbər kontentinin birlikdə təqdim olunması baxımından bu mobil tətbiq ilkdir.

"APA Group"un İnformasiya Xidməti Departamenti tərəfindən hazırlanmış mobil tətbiqdə əsas üstünlüyü istifadəçi interfeysinin rahatlığı, vaxta qənaət və normal rejimdə işləmək təşkil edir.

Artıq "Android" əməliyyat sistemli telefonlar üçün istifadəyə verilmiş tətbiqi istifadəçilər endirə bilərlər. ( https://play.google.com/store/apps/details?id=com.apagroup) Mobil tətbiq yaxın günlərdə IOS əməliyyat sistemli telefonlar üçün də istifadəyə veriləcək.

Qeyd edək ki, "APA Group" Media Şirkətinin əsası 2004-cü il noyabrın 16-da APA İnformasiya Agentliyinin yaranması ilə qoyulub. Hazırda ölkənin və Cənubi Qafqaz regionunun ən böyük media şirkətlərindən olan "APA Group"a APA İnformasiya Agentliyi, ONA İnformasiya Agentliyi, Lent.az və vesti.az xəbər portalları, Kulis.az online ədəbiyyat dərgisi, Apasport İdman Agentliyi və APA TV internet televiziyası daxildir.

Şirkətin Azərbaycanın bütün bölgələrində, həmçinin dünyanın müxtəlif ölkələrində müxbir məntəqələri fəaliyyət göstərir. Şirkət gün ərzində müxtəlif dillərdə yazılı və görüntülü 1000-ə qədər xəbər istehsalı və yayımı ilə məşğuldur.

"APA Group" a daxil olan xəbər şirkətlərinin sosial media səhifələrinin 1.5 milyondan artıq izləyiciləri var.

Şirkət xəbər və analitik məzmunlu kontentin istehsalı və satışı ilə yanaşı, piar məqsədli xəbər xidməti göstərir, reklam və piar və İT xidməti göstərir.

• Rasim Balayev: "Ola bilsin ki, artıq heç bir rolda çəkilmədim" - Müsahibə
• “Nəriman Nərimanov - 155” adlı geniş kitab sərgisi açılıb
• Film layihələri müsabiqəsinin reqlamenti açıqlandı