“Hədəf” Nəşrlərinin təsisçisi olduğu “Ustad” ədəbiyyat və sənət dərgisinin təşkil etdiyi “ÜstAd” uşaq yazıları müsabiqəsinin nəticələri məlum olub. Müsabiqə istedadlı məktəblilərin üzə çıxarılması məqsədilə təşkil olunmuş, 8-15 yaşlı məktəblilərin iştirakı nəzərdə tutulmuşdu. Müsabiqəyə yalnız Azərbaycan dilində olan əsərlər qəbul edilirdi, onların həcminə məhdudiyyət qoyulmurdu. Yazıların mövzusu milli adət-ənənələrimiz, Azərbaycanın tarixi, mədəniyyəti, musiqisi, filmi və ədəbiyyatını əks etdirməliydi.

Qısa vaxt ərzində göstərilmiş [email protected] ünvanına xeyli yazı daxil olub. Təşkilat Komitəsi həmin yazılardan ən diqqətəlayiq olanları seçərək Münsiflər Heyətinə təqdim edib. Qiymətləndirmə yaş kateqoriyası üzrə aparılıb. Münsiflər Heyəti isə 10 ballıq meyar ilə qiymətləndirərək müsabiqəyə göndərilən yazıların qısa siyahısını açıqlayıb. Beləliklə, qısa siyahıda Münsiflər Heyətinin rəğbətini qazanan və ən çox bal toplayan imzalar aşağıdakı kimi sıralanıb (təkcə 14 yaş kateqoriyası üzrə heç bir yazı qənaətbəxş hesab edilməyib):

8 yaş kateqoriyası üzrə qalib Yusif Cəbili – “Mikayıl Müşfiq” hekayəsi;

9 yaş kateqoriyası üzrə qalib Məhəmməd Əhədzadə – “28 may – Respublika günü” inşası;

10 yaş kateqoriyası üzrə qalib Rüxsarə Həsənli – “Xeyirxahlar krallığı” nağılı;

11 yaş kateqoriyası üzrə qalib Nəzrin Məmmədova – “Mənim bayrağım” inşası;

12 yaş kateqoriyası üzrə qalib Ayxan Məmmədli – “Buduq” hekayəsi;

13 yaş kateqoriyası üzrə qalib Nilufər Əzimzadə – “Uçan qız” nağılı;

15 yaş kateqoriyası üzrə qalib Mələk Cəbrayılzadə – “Arazbarı” essesi.

Müsabiqədə qalib olan və münsiflərdən yüksək bal alıb birinci ola bilməyən yazılar “Ustad” dərgisinin 26-cı sayında dərc olunub. Tezliklə, qaliblər mükafatlandırılacaq və bu barədə mətbuatda xəbər veriləcək.

• Efiopiyada ilk insanlarla birlikdə yaşayan yeni növ kəşf edildi
• Latın cazının əfsanəsi vəfat etdi
• İnsanları aldadanlar niyə azadlıqdadır?