Tanınmış türkiyəli tarixçi-alim, Türk Tarix Qurumunun fəxri üzvü, yazıçı İlbər Ortaylı Naxçıvan Dövlət Universitetinin təşkilatçılığı və dəvəti ilə Naxçıvanda səfərdədir.

Kulis.az APA-ya istinadən xəbər verir ki, səfər çərçivəsində professor İlber Ortaylı, Naxçıvan Dövlət Universitetinin rektoru Elbrus İsayev, ali təhsil ocağının rəhbər heyəti və əməkdaşları tarixi abidələri ziyarət ediblər.
İlber Ortaylının səfərinin ilk günündə “Duzdağ Müalicə Mərkəzi” ilə tanışlığı təşkil olunub.

Naxçıvan şəhərindəki “Əcəmi Seyrəngahı” Mədəniyyət və İstirahət Kompleksində yerləşən XVIII əsrə aid “Xan Sarayı” Dövlət Tarix-Memarlıq Muzeyində olan elm xadimi sarayın orijinal memarlıq üslubunu izləyib.

Alim, Kəngərlilərin Naxçıvan tarixində tanınmış tayfa olduğunu vurğulayıb və tarixi fotolar arasında Fikrət bəy Kəngərlini tanıdığını bildirib. O, “kaş ki daha çox vaxtım olardı və Naxçıvandakı bütün tarixi arxiv materiallarını tədqiq edə bilərdim”, deyə qeyd edib.

Naxçıvan şəhərindəki tarixi abidələrlə yanaşı, Culfa rayonunda da qonaq olan professor İlbər Ortaylı hürufilik təriqətinin əsasını qoymuş sufi alim, şair, filosof Fəzlullah Nəiminin Xanəgah kəndi yaxınlığında yerləşən orta əsrlər dövrünə aid türbəsini də ziyarət edib.

Həmçinin Əlincə qalanın şərq yamacında inşa edilən XV əsrə aid Əmirxan türbəsində olub.

Daha sonra Ordubad rayonu ərazisində Zəngəzur dəhlizinə açılan qapı - Kotam kəndini gəzən professor ərazinin tarixən çox önəmli, xüsusi strateji məkan olduğunu, tarix boyu bu torpaqların şəxsiyyətlər yetirdiyini qeyd edib.

Professor gəzinti zamanı Ordubad şəhərinin qədim məhəllələrindən olan Sərşəhər meydanını gəzib.

İlbər Ortaylı Naxçıvanda bir sıra görüşlər keçirəcək və çıxışları olacaq.

• Plastik tullantılardan yaradılan instalyasiya Eskişehirdə nümayiş etdiriləcək
• "Daha danışmağa sözüm qalmayıb..." - Ezra Paundu nə üçün dəmir qəfəsdə saxlamışdılar?
• Nazirlik dövlət tədbirlərinə dəvət olunan müğənnilərə ödənişin edilib-edilməməsinə aydınlıq gətirdi