Milli Məclisin Mədəniyyət komitəsinin sədri Qənirə Paşayevanın müəllifi, həmmüəllifi, layihə rəhbəri olduğu bir neçə yeni kitabın Özbəkistanda imza mərasimi keçirilib.

Kulis.az xəbər verir ki, imza mərasimi Səmərqənd şəhərində baş tutub. Qədim mədəniyyət, ədəbiyyat, sənət və irfan ocağı Səmərqənd şəhərində kitablarının təqdimat və imza mərasiminin keçirilməsini onun üçün əlamətdar hadisə adlandıran Komitə sədri, təqdim olunan kitabların məziyyətlərindən danışıb, onların bir yerdə, Azərbaycanın mədəni irsi, klassiklərimizin yaradıcılığı və ölkəmizin həqiqətləri haqqında etibarlı məlumatlarla səciyyələndiyini bildirib: “Tədbirin “Özbəkistanda Azərbaycan mədəniyyəti və ədəbiyyatı günləri” çərçivəsində, Azərbaycanın və Özbəkistanın dəyərli aydınları, ictimai fəallar və özəlliklə gənclərin iştirakı ilə keçirilməsi çox xoşdur. Ümidvaram ki, bu gün sizə təqdim olunan kitablar qardaş Özbəkistanın qədirbilən oxucuları üçün maraqlı olacaq. Bu tədbir mənim üçün də unudulmaz olacaq, bu günü həmişə xoş duyğularla xatırlayacaq və yenidən sizlərlə görüşməyi arzulayacağam”.

Sözünə davam edən Q.Paşayeva deyib: “Mən minnətdarlıqla vurğulamaq istərdim ki, qardaş özbək xalqı və dövləti bizim haqlı mövqeyimizi həmişə müdafiə edib. Azərbaycan xalqı 44 günlük Vətən müharibəsi vaxtı bunun bir daha şahidi oldu. Qoy, bugünkü təqdimat və imza mərasimi yeni əməkdaşlıqların qurulmasına səbəb olsun. Bu gün burada olduğunuz üçün imza mərasiminə gəldiyiniz üçün hər birinizə könül dolusu təşəkkür edirəm. Çox sağ olun!”

Sonra Q.Paşayeva həmmüəllifi, müəllifi, layihə rəhbəri olduğu kitabları oxucular üçün imzalayıb, ürək sözlərini yazıb, onlarla xatirə şəkli çəkdirib.

• Tom Kruz tanınmaz halda - "Digger" necə qarşılandı?
• "Sağalırlarsa, Məryəm Ananın mərhəmətidir, ölərlərsə, bizim günahımızdır..." - İtalyan yazıçıdan sitatlar
• Seyid Yəhya Bakuvi ilə bağlı konfransın iştirakçıları Xocalı Memorial Kompleksində