Mən o kişini sevirəm - Günün şeiri

Mən o kişini sevirəm - Günün şeiri
6 iyun 2025
# 11:00

Bu gün müsəlmanların Qurban bayramıdır. Kulis.az bu münasibətlə şair Rəbiqə Nazimqızının "İbrahim peyğəmbərə" şeirini təqdim edir.

Nə qolları övlad həsrətiylə göynəyən Sara,
nə oğlu qucağında səhralara duşmüş Həcər anlar məni.
Yalnız sən, İbrahim,
təkcə sən bilərsən...
Mən torpağa bənzəyirəm,
yetirə də bilərəm,
gəzdirə də,
içimdə basdıra da bilərəm hər şeyi.

Dənizdən çox,
qarmaqdakı yemə gələn balıqların sevincinə kövrəlirəm,
balıqçının torunda inci tapmaq ümidinə ağrıyıram.
Hərdən təlxək kimi güldürürəm ,
hərdən timsah kimi ağlayıram.
Saman çöpünü
çöplüyündə boğulanlara saxlayıram.

Mən göylərdən yox,
göylərin özünü istəyirəm,
uçmaq yox,
qucaqlamaq istəyirəm göy üzünü -
qollarım boş qalmasın deyə.
Heç nə istəmirəm,
nə borc, nə hədiyyə...

Mən o kişini sevirəm -
həyatı arxasınca sürüyən adamı.
Hərdən ürəyimi kükrədən,
Hərdən qollarımda kiriyən adamı...
Günahımdan qalxan düzəldirəm,
dəbilqə kimi başımda gəzdirirəm onu,
silah kimi tuşlayıram yad ünvanlara .
Mən hara, məsumluq hara...

Mən iki dəfə qadın oluram -
sevəndə -
dünyanı soyunub
əllərini geyinəndə sevgilimin
gizli-gizli.
Qulağımdan silinəndə başqa səslər,
təmizlənəndə...
Bir də hər ay sonu ,
intizarla gözləyəndə qadınlığın haray çəkib
məni dağa-daşa salan ağrısını.
Ayıbımdan qızaranda üstüm-başım,
kirlənəndə... sevinirəm...
Bax o anda, İbrahim,
içimdən bir hiss keçir -
mən qatiləm -
bətnimdəcə doğulmamış
arzuları
parça-parça öldürürəm...

# 738 dəfə oxunub

Oxşar xəbərlər

Musiqilərini bir-bir sildilər – "Spotify"ın gizli silah layihəsi ifşa oldu

Musiqilərini bir-bir sildilər – "Spotify"ın gizli silah layihəsi ifşa oldu

11:00 31 iyul 2025
Çəkilişlərdə eynəyi 160 dəfə dəyişdirilən məşhur film personajı

Çəkilişlərdə eynəyi 160 dəfə dəyişdirilən məşhur film personajı

11:00 31 iyul 2025
"Əylən, sənə çay demişəm..." - Günün şeiri

"Əylən, sənə çay demişəm..." - Günün şeiri

10:49 31 iyul 2025
Məşhur sənətçinin ifasında "Sən gəlməz oldun"

Məşhur sənətçinin ifasında "Sən gəlməz oldun"

10:40 31 iyul 2025
Kitabı 250 dilə tərcümə edilən, arvadından ilhamlanıb yazan görkəmli yazıçı  - 65 il sonra onun qatili nəyi etiraf etmişdi?

Kitabı 250 dilə tərcümə edilən, arvadından ilhamlanıb yazan görkəmli yazıçı - 65 il sonra onun qatili nəyi etiraf etmişdi?

10:00 31 iyul 2025
Cahandar ağa və Mələk kim idilər? - "Dəli Kür" filmindəki ciddi nöqsanlara İsmayıl Şıxlının sərt iradı

Cahandar ağa və Mələk kim idilər? - "Dəli Kür" filmindəki ciddi nöqsanlara İsmayıl Şıxlının sərt iradı

09:00 31 iyul 2025
#
#
# # #