Əməkdar artist Nailə İslamzadə sosial şəbəkələrdə arxiv fotolarının paylaşılmasına və yaşının xüsusi vurğulanmasına etiraz edib.

Kulis.az xəbər verir ki, tanınmış aparıcı bu barədə sosial mediada paylaşım edərək narazılığını bildirib.

Onun sözlərinə görə, illər əvvəl çəkilən şəkillərin indi çəkilmiş kimi təqdim olunması, üstəlik, təhrifedici başlıqlarla yayımlanması düzgün deyil:

“Tez-tez şəkillərim paylaşılır. Dəyər verənlərə, xoş söz yazanlara təşəkkür edirəm. Amma bu paylaşımlar mənim istəyimə uyğun deyil. Bəzən fotolarım kontekstdən çıxarılır, diqqət çəkmək üçün yanlış başlıqlarla təqdim olunur. Mən illərlə tamaşaçı etimadı qazanmışam və bu mənim üçün ən böyük mükafatdır. İstəmirəm ki, şəkillərim ‘klik’ və ‘layk’ naminə müzakirə mövzusuna çevrilsin”.

Aparıcı bildirib ki, onun doğum tarixi 1961-ci ildir və bunu təkrar-təkrar vurğulamağa ehtiyac yoxdur:

“Xarici görünüş bir insanı ilk baxışda cəlb edə bilər, amma əgər içində nur, mərhəmət və ağıl yoxdursa, o gözəllik tez solur. Mən ictimai insanam, haqqımda yazmaq istəyə bilərsiniz. Amma illər əvvəl çəkilmiş videolarımı indi çəkilmiş kimi təqdim etməyin. Mövzu tapmaqda çətinlik çəkirsinizsə, bir az daha yaradıcı düşünün. Haqqımda yazmaq istəsəniz, birbaşa mənə müraciət edin”.

Nailə İslamzadə əlavə edib ki, bu cür halların davam etməsi etik normaların və şəxsi hüquqların pozulması kimi qiymətləndiriləcək.

• Mühacir mətbuatımızın fəallarından biri - O, niyə Tiflisdə həbs edilmişdi?
• Qulu Ağsəsin "Saat 6-nı gözləyirəm" kitabı nəşr olundu
• Heykəltəraş Cümşüd İbrahimlinin 85 illiyi qeyd olundu