Dahi Azərbaycan bəstəkarı Üzeyir Hacıbəylinin “Arşın mal alan” operettası növbəti dəfə Çində səhnələşdirilib.
Azərbaycan Respublikasının Çin Xalq Respublikasında səfirliyindən APA-ya verilən məlumata görə, tamaşanın yeni quruluşda (konsert versiyası) premyerası Çində keçirilən “Böyük Çin Səddi – bir kəmər, bir yol” beynəlxalq folklor və sənət festivalı çərçivəsində Lanfan şəhərindəki “İpək Yolu” Beynəlxalq İncəsənət Mərkəzində gerçəkləşib.
Konsert Azərbaycan Respublikasının Çin Xalq Respublikasında səfirliyi, Azərbaycan Mədəniyyət Nazirliyi, Xebey vilayətinin hökuməti, Tyanzin şəhərinin bələdiyyəsi və “ANN Group”un dəstəyi ilə baş tutub.
Qonaqları salamlayan səfir Əkrəm Zeynallı qeyd edib ki, tarixi İpək yolu bəşəriyyətin mədəni inkişafında böyük rol oynayır. O, Azərbaycanın da tarixi İpək yolunun üzərində yerləşdiyini və özünün mədəni mirası, o cümlədən musiqi və ədəbiyyatı ilə hər zaman diqqət mərkəzində olduğunu vurğulayıb.
Dahi Azərbaycan bəstəkarı Üzeyir Hacıbəyli haqqında məlumat verən səfir onun anaqdan olduğu 18 sentyabr tarixinin Azərbaycanda Milli Musiqi Günü kimi qeyd olunduğunu və hər il ənənəvi Üzeyir Hacıbəyli adına Musiqi Festivalının keçirildiyini diqqətə çatdırıb.
Sonra “Arşın mal alan” operettası Tyanzin şəhərinin Mahnı və Rəqs Opera Teatrının orkestr və vokalistlərinin ifasında yeni quruluşda və Çin dilində təqdim olunub. Libretto çağdaş həyata uyğunlaşdırılıb və çinli tamaşaçıların anlaması məqsədilə sadələşdirilib.
Tamaşanın baş məsləhətçisi və koordinatoru – Azərbaycan Dövlət Akademik Opera və Balet Teatrının baş dirijoru və musiqi rəhbəri, Əməkdar artist, beynəlxalq müsabiqələr laureatı Əyyub Quliyev, baş rejissor və bədii rəhbər İpək Yolu Mədəniyyət Birliyinin Prezidenti Klaudia Yanq, kastinq üzrə direktor Li Saofeyvə Lu Şen, orkestrin dirijoru Sun Tsinkaydır. Əsgər rolunu Van Tsinan, Glüçəhrə rolunu isə Tszan Yanron ifa edib.
Bizi Telegram-da izləyin
t.me/kulis_az
Bizi Instagram-da izləyin
Bizi Facebook-da izləyin
Bizi Twitter-da izləyin
