ABŞ-nin məşhur musiqi yarışması "The Voice" uzun illərdən sonra ən böyük format dəyişikliyinə imza atır.
Kulis.az xəbər verir ki, NBC kanalı layihənin 31-ci mövsümünü sıravi istedadlar yerinə tanınmış simaların yarışacağı "The Voice: Celebrity" konsepti ilə təqdim edəcək.
Yeni mövsümdə aktyorlar, musiqiçilər, sosial şəbəkə fenomenləri, idmançılar, komediyaçılar və realiti-şou ulduzları birinci olmaq üçün səhnəyə çıxacaqlar.
Format dəyişikliyi ilə yanaşı, proqramın aparıcı və münsif heyətində də ciddi dəyişikliklər edilib.
Şounun yarandığı 2011-ci ildən bəri dəyişməz aparıcısı olan Karson Dali öz yerini Keke Palmerə təhvil verəcək, Dali isə layihədə icraçı prodüser kimi fəaliyyətini davam etdirəcək.
2027-ci ilin yazında yayımlanması planlaşdırılan xüsusi mövsümdə münsif kreslosuna Co Conas əyləşəcək. Onu bu payızda başlayacaq 30-cu mövsümdən layihəyə daxil olan Kuin Latifa və Rayli Qrin müşayiət edəcəklər.
Qeyd edək ki, ilk dəfə 2010-cu ildə Niderlandda yayımlanan "The Voice" yarışmasının daha əvvəl "The Voice Kids" və "The Voice Generations" kimi müxtəlif versiyaları hazırlansa da, ulduzların yarışdığı bu konsept ABŞ televiziya tarixində ilk dəfə reallaşdırılır.
“The Voice”də böyük format dəyişikliyi – Məşhurlar yarışacaq?
5 avqust 2026
16:30
