“Şahsiyet” serialındakı Agah Beyoğlu roluna görə Beynəlxalq “Emmi Mükafatları”nda Ən Yaxşı Kişi Aktyoru mükafatına sahib olan məşhur türk aktyor Haluk Bilginer İstanbulda böyük coşqu ilə qarşılanıb.
Kulis.az Türkiyə mətbuatına istinadən xəbər verir ki, “Emmi mükafatı alan ilk Türk” olaraq tarixə düşən Haluk Bilginer hava limanında jurnalistlərin suallarını cavablandırıb. Bildirib ki, mükafata namizəd göstərilməsi onun üçün qürurverici idi: “Mükafatı qazanmağım gözəldir, amma məni ən çox sevindirən Türkiyədə bu mükafatın sevinc və qürurla qarşılanmasıdır. Demək ki, belə bir enerjiyə ehtiyac vardı. Ona görə də hamı çox sevincli, mən də çox xoşbəxtəm”.
Jurnalistin “Populyarlıq sizcə uğurdurmu?” sualına aktyor: “Xeyr populyarlıq uğur deyil. Uğur işin keyifiyyəti və neçə il davam edəcəyinə bağlıdır. Bir il sonra unudulursa uğurlu deyil, 20 il sonrra yenidən izlənilirsə bu artıq uğurdur” cavabını verib.
