Kulis.Az şair İlham Qəhrəmanın yeni şeirlərini təqdim edir.
Zəhranın şeiri
Dimdiyə alıb gətirir
Beşiklərdə evə payı, -
Bütün paylardan şirindi
Leyləklərin nəvə payı.
Ürəyimin özəyidi,
Sevgimizin də lalası.
Qanadın bərk olsun, leylək,
Kimin var belə balası?!
Cincilimim, quşəppəyim,
Quzuqulağım, kişnişim.
Noğulum, şəkərim, nabatım,
Qax qurusu, kişmişim.
Dədəsinin ürək qutu,
“Ciççi!” desəm gülüb gedər.
İki dədəsi evinə
Sevgisini bölüb gedər.
“Ağlasam” könlümü alır,
Bilir hər “əməli” balam.
Dədə sənə şeir yazır,
Şeiri yeməli balam.
Arxa gələn siftə sutək
Əvvəli iməyə getdi,
Dalınca “datde” eylədi
Nənəyə “köməyə” getdi.
Əlini ovcumda tutsam,
Ruhum tez qaçar ovcuma.
Süzülər süd şirinliyi
Körpə əlindən canıma.
Cincilimim, quşəppəyim,
Quzuqulağım, kişnişim.
Noğulum, şəkərim, nabatım,
Qax qurusu, kişmişim.
25.05.2016
Səni düşünmək
Səni düşünürəm, səni haçandır...
Bir acı söz söylə xətrimə dəysin,
Bir acı söz söylə qəlbimi sındır.
Mən səni sevdimsə, əl çəkməyəcəm
Mən sənə vurulsam, vermərəm məhəl
Zəhləni tökəcəm hər axşam, səhər.
Bir sevən gördünmü heç yanılmaya,
Bir ürək gördünmü qapısı olsun,
Kimsə gəlib döyə açan olmaya?!
Ağlına da gəlməz, xəbərin yoxdu,-
Sənin işləklərin öldürür məni,
Gözümün altında göl durur mənim.
Ağlına da gəlməz hansı ürəkdə
Axşamı salmısan, gecələmisən,
Bir tanrı bəndəsin gic eləmisən.
Bir Allah şahiddir bu yer üzündə
Sevginin ən bədbəxt girinci mənəm,
Sevgidən dərd gəlsə, birinci mənəm.
Sən elə qəddarsan, elə zalımsan,
Yiyəli bir mülkə köç eləmisən,
Tövbəli ürəyə güc eləmisən.
Məni nə günlərə qoyubdu canın...
Mənə nə etmisən – barmağım azdı,
Deyərəm... demərəm... hayıfdı canın.
Mənim vurulmağım çox ağır olur,-
Ağır keçirirəm qızılca kimi,
Məni sevən qadın qan-bağır olur.
Səni düşünürəm, səni haçandır...
Bir acı söz söylə xətrimə dəysin,
Bir acı söz söylə qəlbimi sındır.
Bir acı söz denən qırılım gedim,
İlan qabığından, qılınc qınından
Sıyrılıb çıxantək sıyrılım gedim.
07.06.2016
Mənzərə janrında
Telli balam, məhəllədə
İtlərin sananan qabırğası
güzəranımızın bəyanı,
Pişiklərin çıxan donqarında
üz qaramız dolanır.
Bilən bilir - məmləkətdə
toxun acdan xəbəri yoxdu.
Gülzada qarıdı cehiz ucundan,
Qasım evlənmir ki, ev yeri yoxdu.
Harda zalımlıq var, telli balam,
orda nə ayparası var,
nə də ki, xaç var.
Su maşınları duran yerdə
suya tamarzı ölən ağac var.
Telli balam, İlahi ədalət
tək Əzrayıl sağolmuşdadı –
heç kəs umsuq olmayacaq,
Şərbətindən hamıya pay düşür.
İlahi ədalət də kimə lazımdı?!
O gələn kimi kəndə vay düşür.
10.06.2016
Sevgisi dəniz
Günəş səndən doğur,
ay səndən yanır.
Səndən yağış yağır,
səndən qar tökür.
Həyətdə gilənarım var,
o da səndən çiçəkləyir,
səndən bar tökür.
Çəpərdəki qaratoyuğun
avazında havalanarsan,
Bu yaz bir sirrini də açdım -
pəncərəmdə tənəklə
qol-boyun olarsan.
Anamın köynəyimə tikdiyi
dua kimi gözün üstündədi hər an,
Ürəyim gəlməz,
bu sevgiyə qıymaram.
Saçıma çəkdiyim daraqda,
Qürurla baxdığım bayraqda
görünürsən.
Bütün gözəlliklərdə
yer eləmisən,
Şairə nə lazımdı –
hər yeri, hər şeyi şeir eləmisən.
Sən olan yerdə nə dərd olar?!
Sən sevgisi dənizimsən,
Mən səndə qərq olmuşam
Kim belə bəxtəvər qərq olar?!
11.06.2016
***
Könlüm evi mömindi,
sevgidi qibləsi
Sən bir gülsən,
ürəyim gül ərbəsi.
11.06.2016
Bilməsin
Bu günlər ölmək istəmirəm, -
Ona bir söz dedim cavab vermədi,
Mənim dilimdə “gəlsin” bitdi,
onun dilindən qıfıl götürülmədi
yolumu kəsdi “gəlməsin”.
Birdən ürəyinə salar,
dərdindən öldüyümü bilməsin.
12.06.2016
İkimiz üçün yer
Duraq bu yerlərdən ayaq götürək,
Gedək gözlərimiz tutan bir yerə,
Gedək könlümüzə yatan bir yerə.
Bütün idmiləri buraxaq qalsın,-
Getməsin bir qanun, bir tabu biznən,
Bir bəndə çəkməsin hesabı biznən.
Doğmadan ayrılaq, yaddan ayrılaq,
Gilizdən ayrılan güllələr kimi -
Bu bizə qoyulan addan ayrılaq.
Mən orda adını Həvva çağırım,
Sən mənim adıma Adam deyərsən,
Bütün tabulara “qadam!” deyərsən.
Ataq əynimizin paltarını da,
Təzə paltar geyək yarpaqdan, otdan,
Bir adam baxmasın bizə gözaltdan.
Bir qaya altını bəyənək ev tək,
Adəmlə Həvvanın evidi deyib, -
Səliqə-sahman et, o evə əl çək.
Bir çayın ləpəsi döyən yer olsun,
Səhərlər o çaya qarmaq sallayaq,
Axşamlar əyləşib ayaq sallayaq.
Dolanaq quşumuz qonan yer tapaq
Ora bizdən başqa kimsə getməsin
Elə yer olsun ki, alma bitməsin.
Ayrı haramız var, hara üz tutaq?!
Duraq bu yerlərdən ayaq götürək,
Bir ayaq dəyməyən yerə üz tutaq.
18.06.2016
Qudurub çiyninə ağız atasan
(“Acının şəkli” filmi)
Kömür nəmi çəkən kimi
Canın çəkdiyindən acıyar bir gün.
Çəkdiyin canında yuva eyləyib,
Dişini üstünə qıcıyar bir gün.
Hava bağlayarsan, havan çatışmaz
Yediyin-içdiyin dönər zəhərə...
Günlərin bir günü
ya dəli, ya havalı kimi
durub girərsən şəhərə.
Bir cındırlı pir misallı,
cır-cındır geyib əyninə,
Hərdən qudurmuş vəhşitək
ağız atarsan çiyninə...
Başlayar şəhərin hoydu-hoydusu -
Kim ağaca əl atar, kim basar daşa,
Haşa söyləyərlər - səndən min haşa!
Hər kəs barmağıyla tuşudub səni -
Qısqırdar üstünə bütün itləri.
İtlər yer-yerdən cumar üstünə,
Bir adam deməz ki, tutun itləri.
Bu it bəs kimin itidi,
dişləri belə itidi -
çənəsində gör bir neçə “xəncəri” var?!
Görərsən dalınca düşən itlərin
hamısının boynunda zənciri var.
Qaranəfəs qaçan yerdə
Eşidilməz - kim nə dedi, nə danışdı.
İtlər səmtinə çatanda
görərsən hamısı tanışdı, -
Bu dişin qıcırdan qanığınacan,
Bu zəncir gəmirən əniyinəcən.
Bir dalanda bərk qorxarsan,
Sonra sevinərsən – sən durdun,
şükür, itlər də yavaşıdı!
Görərsən bu itlərin zəncirini
tutan düzmə düzənlər başıdı.
...Yaxında biri dayana,
əlində də kamerası...
“Nə baş verir?” - deyənlərə
deyə ki, “film çəkilir.”
Bir başqası da qayıda –
film yox, zülüm çəkilir.
28.06.2016
Quşların gündüz küçəsi
“Ata, Taksimdə quşlara dən səp”.
Oğlum Nicat
1.
Dəyirmana gedən dəni,
Taksimə göndərən oğlum.
Dən səpmişəm dənlənirlər,
Quşlardı yan-yörəm, oğlum!
Mərhəmət sevgi çətridi,
Ondan gələn gül ətridi.
Sən göndərdin mən gətirdim,
Allahdı dən verən, oğlum!
Sığınarlar koğuşlara,
Bala girər ağuşlara.
Hardan gəldi dən quşlara,
Bildilərmi görən, oğul?!
2.
Taksim bir görüş yeridi,
Quşların “kənd ortası”dı.
İstanbulun bu meydanı
Onlara Haqq butasıdı.
Gecə düşməmiş uçarlar,
Səhərlər yenə gələrlər.
Yenərlər adam içinə,
Taksimdə dənə gələrlər.
O papıllı, bu kəkilli,
Bu cücə də beçəsidi.
Nazlanıb gəzən quşların
Taksim gündüz küçəsidi.
Oğlum göndərən sovqatı
Səpib yemlədim quşları.
Bir ovuc dənin başına
Yığıb cəmlədim quşları.
18.09.2015
Təbriz
Telli balam, Təbriz boyu
dolanbaclar, döngələr...
Təbriz desəm, xəyalıma
bir naçar bağban gələr.
Telli balam, o bağban
bağında yolu tutar,
unudar yolağı tutmaz.
İllərdi körpə zoğlardan
bir ağaca calaq vurar,
calağı tutmaz.
2.
Təbriz bizə nə çəkdirdi
bir Allah bilir, telli balam.
Təbriz dilimə gələndə
əlim dizimə gəlir, telli balam.
Təbriz dərdimiz bir oddu -
çox şair canı yaxdı, telli balam,
Qırağı qat kəsmiş xalça kimidi -
açanı yoxdu, telli balam.
Qolubağlılar ağzıbirdə
şərqisini deyər, oxuyar duasın,
Təbriz dərdimizin ən gözəlidi -
bəzək yerinə divardan asın.
Telli balam,
Təbriz üçün biz kişilər
həm ölüdü, həm də sağdı,
Təbrizdən məktub alarsan
oxuyub görərsən ağdı.
Telli balam,
Fələk oğlu Fələk olsam,
mən yağmaram, daş tökərəm.
Təbriz yadıma düşəndə
bir yumaram, beş tökərəm.
18.11.2015
