Ləpələr danışdı

Sahildə görüşdük səninlə

Dindi könül duyğularımız.

Qağayılar sənin dilinlə

Mavi dalğalar əllərinlə

Göyün üzü şəfəqləriylə

Sevgi saçdı ətrafımıza.

Sinəyə sığmayan köksümüz

Görüşdü ayrıldı ömrümüz.

Pıçıldaşan ləpələr

danışdı səssizcə...

Sevgilər sirrini bölüşdü,

yaşadı bizimlə...

Yaradanım

Möhtacdır gecələr

Gecələr üşüyər

Yorğana bürünər

Küləklə sürünər

Gecələr qaranlıq

Sönmüş ocaqların

Ötmüş yalanların

Qorxaq insanların

Tutaraq əlindən

Yeriyər qaranlıq

Sabahlara doğru

Möhtacdır sabahlar

Üfüqlər açılar

Şəfəqlər saçılar

Tələsən insanlar

Parlayan şəfəqin

Tutaraq telindən

Harasa qaçışar

Səhərki aydınlıq

Haraya qaçırıq

Məkan və anlayış

Biz, fikir və qaçış

Qovuşmaq istəyi

Qalır bircə qarış

Bu taleyin hökmü

Həyat, zaman, qədər

Ömürlər calanar

Nələrsə yaşanar

Yaranan, yaradan

Düşün Sən və bu an

Fikirləş görərsən

Olmadı deyərsən

Qarşısında duran

Sirləri özündə

Kiminin gözündə

Kiminin könlündə

Kimlərinsə yanıb

Yaxan sözündə

Təbiətin şahı

İnsanlığa toxum

Verilən dölündə

Görünməyən vardır

Əlbət, bu dünyanın

O dünyanın özü də

Möhtacdır sönməyən

Möhtacdır dönməyən

Əbədi işıqlı

Sahilsiz eşqinə...

Sev insanı

Sev insanı, bağlan ona yaxın bilib

Qəlb evində özgələri doğma bilib

Bu həyatı ən şirin bir nemət bilib

Yaşa-yarat, xəyalların gerçək olsun

Məchul olan gözəlliklər sənin olsun

Bu həyatda səni duyan çevrən olsun

Dünya dolub-boşalırsa,

Demək kürə, olur çevrə.

Ürəklər çek boş çevrəyə, qoy çevrən

ürəklərlə dolu olsun .

• Bakı Uşaq Teatrı Elistada keçirilən festivalda iştirak edir
• Çinar yazıları - Mübariz Örənin yeni hekayəsi
• Görkəmli pianoçu Elmira Səfərovanın məzarı ziyarət olundu