Azərbaycan xalqının Vətən müharibəsində qəhrəmanlığına həsr olunan və gənc nəslin vətənpərvər ruhda yetişməsi, tarixi yaddaşın qorunub saxlanılması məqsədi daşıyan “44” bədii filmi tezliklə ictimaiyyətə təqdim ediləcək.

Kulis.az xəbər verir ki, ekran əsəri bir kursantın gözü ilə canlandırılan qəhrəmanlıq və məhəbbət dramıdır.

Filmdə əks olunan hadisələr xüsusi təyinatlıların timsalında Vətənin müdafiəsi uğrunda ayağa qalxan bir nəslin ruhunu, iradəsini və fədakarlığını təcəssüm etdirir. Süjetin mərkəzində Xüsusi Təyinatlı Qüvvələrin zabiti Rəşad Xəlilov, Azərbaycanda çalışan türk həkim-ortoped Zeynəb Özdəmir və xüsusi əməliyyat qrupunun komandiri polkovnik Ramazan Kərimov dayanır.

“44” sadəcə müharibə haqqında film deyil. Bu ekran əsəri qəlbi Vətən sevgisi ilə döyünən, ümidini heç vaxt itirməyən və sona qədər torpaqlarının azadlığı uğrunda fədakarlıqla mübarizə aparan Azərbaycan xalqının hekayəsidir.

“44” bədii filmi istehsal miqyası, cəlb olunmuş mütəxəssislərin sayı, çəkiliş coğrafiyası, istifadə olunan texniki resursların həcmi və beynəlxalq əməkdaşlıq səviyyəsi baxımından Azərbaycan tarixində ən böyük kinematoqrafik layihələrdəndir.

Filmdə azərbaycanlı aktyorlarla yanaşı, Türkiyənin tanınmış aktrisası Özge Gürel də rol alıb. Çəkilişlərdən əvvəl aktyor heyəti Xüsusi Təyinatlı Qüvvələrin təlim-məşq bazasında hərbi-taktiki hazırlıq keçib.

Filmin çəkilişləri Bakı, Abşeron, Ağdam, Cəbrayıl, Füzuli, Goranboy, Gəncə, Xocavənd, Xızı, Lerik və Şuşada aparılıb.

Qeyd edək ki, Özge Gürel 5 fevral 1987-ci ildə İstanbulda anadan olub. O, karyerasına "Kızım Nerede?" serialındakı Zeynep obrazı ilə başlayıb. Daha sonra "Muhteşem Yüzyıl" və "Medcezir" kimi populyar layihələrdə epizodik və köməkçi rollarda çıxış edib.
​Aktrisaya ən böyük beynəlxalq şöhrəti isə baş rolunu canlandırdığı "Kiraz Mevsimi" romantik komediya serialındakı Öykü obrazı gətirib. O, həmçinin "Dolunay" və "Bay Yanlış" seriallarında məşhur aktyor Can Yamanla birlikdə baş rolları paylaşaraq Türkiyədən kənarda da geniş tamaşaçı kütləsi toplayıb. Həm ekranlarda, həm də sosial mediada böyük izləyici kütləsinə sahib olan Özge Gürel indi də Azərbaycanın Vətən müharibəsinə həsr olunmuş "44" filmindəki iştirakı ilə yerli kinosevərlərin diqqətini üzərinə çəkir.

• “İçərişəhər” Dövlət Tarix-Memarlıq Qoruğu haqqında Əsasnamə”yə dəyişiklik edildi
• Qardaşını və oğlunu şəhid verən yeganə Xalq yazıçımız – Sabir Əhmədli haqqında
• “Ağıldan kəm Jurden” tamaşasının premyerası baş tutdu