Bu günlədə Qəşəm Nəcəfzadənin “Adı Qəşəm” şeirlər kitabı çap olunub. Topluya şairin son illər yazdığı şeirlərin bir qismi daxil edilib.

Kulis.az bu kitabdan bir neçə şeiri oxuculara təqdim edir.

Ata

Oğlanlarım, mən sizin yerinizə olsaydım atamı çox sevərdim

Adına şeir yazardım hətta.

Alnı nədi, heç qoymazdım şəkilləri qırışlana

Yadıma salardım

O mənim beşiyimin kəndirini tavana necə mismarlamışdı,

Mən də onun baxışlarını könlümə elə yazardım.

Sizə iki şeir yazdım, oğlanlarım

Birini uşaqlığınıza,

Bunu da böyüklüyünüzə...

Birini qucağıma alanda

Birini də qucağımdan düşürəndə...

Mən dəqiq bilirəm,

Bütün ataları övladları öldürür

Bunu bilirsinizmi, siznənəm, eyy

Hə, siznən

Onnan

Sənnən...?

Bütün ayrılıqlar qəflətən və özü də səbəbsiz olur.

Ağlınıza gəlirmi ki, bir gün atanızın ayaqqabılarını

Qapıda görməyəcəksiniz?

Ən birinci qapıdan ayaqqabılar yığışdırılır,

Adamı yaman yandırır ayaqqabı yeri...

Dəfn mərasimi qədər həyatda qəddar heç nə yoxdur...

Sizin yerinizə olsaydım bunu həmişə yadımda saxlardım.

Yuxudan tez durardım ki, atamı çox görüm

Başdaşı üçün şəkillərinə baxmazdım...

Öləndən sonra şeirlərini oxumazdım

Mən sizin yerinizə olsaydım atam haqqında xatirə danışmazdım....

Şeirimə bax, şəklimi əzbərlə…

Getdim uzaqlarda səni çağırmağa

Yaxında olanda səsim ancaq bir santimetr uça bilir

Eşitmirsən...

Görən uzaqlarda necə görünür şəklin…

Necə səslənir adın?

Getdim uzaqlardan səni çağırmağa

Görüm aramızda

Neçə hecadır kilometrlər.

Necə qafiyələnir buludlar, yollar

Ağaclar və küləklər…

Getdim uzaqlardan səni çağırmağa

Tökülsün səsimdən soyuqdəymələr

İncimələr

küsüşmələr…

Getdim uzaqları sənə sevdirməyə.

Eşitdiyimə görə, çoxdandı şəklimi oxumursan

İndi şeirimə bax,

Şəklimi əzbərlə.

Hələ yaxından gələn görməmişəm

Gələn uzaqdan gəlir…

Getdim uzaqdan gəlməyə.

Yadındadı,

Ürəyinə keşikçi dayanmışdın…

Sən bu tərəfdən gözləyəndə,

Mən o tərəfdən gəldim!

Mənim balam, nəfəsini gey əyninə istilən

Amerika külək əsir
Şərq oxuyur
Qış-qış
Xaş-xaş
Xəş-xəş
Amerikanı görmüsənmi, Əliş əmi
Görüb salam vermisənmi, Əliş əmi.
Mən ölüm düzünü de…

Rusiya əsir
Əsir Rusiya
Havası ölkələrin
Burnundan gəlib keçir vız
Vız-dız
Cız-bız
Mız-mız
İraqda siyasət əsir
Güllələr uçur uşaqları qızdırmağa
Qız balam
Qız balam

Gecə-gündüz ot daşıyan, Əliş əmi
Külək olub od yaşayan, Əliş əmi
Nə var, nə yox?
Oğlun öldü gələ bilmədim
Mən də öləndə
Sən gəlmə
Mən belə əclafam

İsrayil sazaq əsir
Mənim balam, nəfəsini gey əyninə istilən
Bu da sonuncu
Kilim
Sonuncu palaz
Az-maz
Namaz
Qafqaz
Qapaz
Yenə televizorda
Siyasətçilər
Xəbərçilər
Atətçilər
Arsız
Abırsız
Həyasız
Həyasız
Anasız
Bacısız
Ağrısız
Acısız
Onsuz
Bunsuz
Sənsiz
Mənsiz
Yönsüz
Sözsüz
Yüz
Süz .

• Evli ola-ola sevdiyi qızın pəncərəsi altında gecələyən Emin Sabitoğlu haqqında
• Tağıyev ingilis jurnalistə nə demişdi? - 100 illik sirr
• "Huma Quşu: xeyirxahlıq və cəsarət bələdçisi" - Xeyriyyə axşamı