İyunun 5-də Tərcümə Mərkəzinin yeni nəşri – “Türkiyə ədəbiyyatı antologiyası” (nəsr) kitabının təqdimat mərasimi keçirilib.

Kulis.azın verdiyi xəbərə görə, Bakıdakı Yunus Əmrə İnstitutunda baş tutan tədbirdə Türkiyənin Azərbaycandakı səfiri cənab Erkan Özoral, Türkiyənin Azərbaycandakı səfirliyinin mədəniyyət müşaviri İrfan Çiftçi, Şimali Kipr Türk Respublikasının Azərbaycandakı təmsilçisi xanım Ufuk Arca Turganer, Avrasiya Yazarlar Birliyinin sədr müavini, yazıçı Osman Çeviksoy və digər qonaqlar, eləcə də Azərbaycanın tanınmış ziyalıları iştirak ediblər.

Tədbiri giriş sözü ilə Azərbaycan Respublikası Nazirlər Kabineti yanında Tərcümə Mərkəzinin direktoru Afaq Məsud açıb. O, XIX–XXI əsr Türkiyə ədəbiyyatının mənzərəsinin ilk dəfə belə bir akademik formatda təqdim edildiyi, kitabın Türkiyə ədəbiyyatının Azərbaycanda tanıdılması istiqamətində nəzərdə tutulan növbəti ciddi layihələrin ilki olduğu haqqında söz açıb, hazırda Mərkəzdə “Türkiyə şeiri antologiyası” üzərində də işlərə başlanıldığını qeyd edib.

Daha sonra Türkiyənin Azərbaycandakı səfiri cənab Erkan Özoral çıxış edib. Səfir hər iki qardaş ölkənin ədəbiyyatlarının tanıdılması və təbliği istiqamətində Mərkəzin gördüyü işləri yüksək qiymətləndirərək, bu fəaliyyətin davamlı şəkildə həyata keçirilməsinə böyük ehtiyac duyulduğunu, Mərkəzin ərsəyə gətirdiyi bu kitabın Türkiyə-Azərbaycan qardaşlığının və doğmalığının önəmli timsalı olduğunu qeyd edib.

Türkiyədən tədbirə təşrif buyurmuş Avrasiya Yazarlar Birliyinin sədr müavini Osman Çeviksoy antologiyanın tərtibindən və bədii məziyyətlərindən danışıb. O, kitabın keyfiyyətli tərcüməsi və nəfis tərtibinə görə təmsil etdiyi qurumun rəhbərliyi adından Tərcümə Mərkəzinə təşəkkürünü bildirib və Avrasiya Yazarlar Birliyinin fəxri diplomunu Afaq Məsuda təqdim edib.

Tədbirdə iştirak edən qonaqlar da öz növbəsində Tərcümə Mərkəzinin iki qardaş ölkə arasında ədəbi əlaqələrin qurulması istiqamətində səmərəli fəaliyyətindən söz açaraq layihənin əhəmiyyətdən danışıblar.

• MEMİM-in “Mədəni irsini qoru” layihəsi Qobustandan başlayıb
• "Titanik"in kapitanının cib saatı rekord qiymətə satıldı
• Rəhman Rəhmanov: "Ayağım çürüyürdü"