Fəridənin şeirləri üçün...

Yaşıl bir çəmənlikdə tək bircə yerdə uzaqdan lalə görüb "gül gördüm, gül" deyə çığıran uşağın sevinci qəribə olur. "Onu birinci mən görmüşəm!" Və bütün uşaqlar o laləyə sarı yüyürür. Amma o uşaq bir ayrı cür yüyürür. Lalənin yerinə başqa şey də qoya bilərsiniz. Göy qurşağını ilk dəfə görüb o birilərinə göstərən uşaq da, kəpənəyi birinci görən uşaq da belə sevinir. Fəridə Məmmədovanın Kulis.Az-da şeirləri yayımlananda mən də eyni sevinci yaşadım. Bu ki, mənim tapdığım çiçəkdir...

Bu, sizə keçən köşələrimdən birində haqqında söz açdığım həmin o istedadlı qızdır. Hansı ki, şeirləri arını özünə çəkən çiçək enerjisiylə çəkmişdi məni özünə sarı.

Mesaj qutusunda yazışmışdıq. Onun guya əcnəbi şairədən elədiyi "tərcümələrin" müəllifinin özü olduğunu biləndə sevinmişdim. Ədəbiyyatımızda yeni istedadlı qadın imzası doğulur deyə sevinsəm də, kədərlənmişdim ki, şeirlərini öz adından yaymağa çəkinir. Amma budur, onun şeirləri məşhur bir saytda yayımlanıb. Deməli, şeirlərinin altına öz imzasını atacaq qədər cəsarətlənib. Hətta bəlkə, az da olsa yazdığım köşə gözəl qızımıza cəsarət verib.

***

Ağaca fərqi yoxdu

Budaqlarından asılan beşikdi, yoxsa adam!

***

Kəsilmiş qadın saçları qədər sahibsizəm

***

Təkcə

Uşaq salan qadınlar anlayar məni

Onlar bilər necə olur boşluğu qucaqlayıb yatmaq

Arzuladığını içindən atmaq...

***

Bir az da

yad dildən çevrilmiş şeir kimiyəm

yəni, əslində, bu deyiləm...

***

Tək olmadığını hiss etmək

Heç də həmişə rahatlıq gətirmir

Məsələn, mən sənin həyatında tək deyiləm...

***

Qaça-qaça keçib gəlmişəm aralarından

Qoy keçim, soyunum... qorxma,

“Sevişək’’ deməyəcəm

Üst-başımda gətirdiyim

Kişi nəzərlərindən arınmaqdı məqsədim...

***

Xəritəyə baxıram... rədd olsun bu boyda dünya

Qollarının arası qədərcə yer qoru... qalanı çoxdu.

Sən orda mərmi alovlarında qızınırsan bəlkə də

Mənsə, üşüyürəm ...birdən gələrsən

Görərəm ki,

Qolların yoxdu.

***

Başa düşürsən, ay adam

öldürüb içimdəki şairi

məndən qadın yaratmaq istəyirlər!

***

Unutmağa çalışdığımı necə başa salım sənə?!

Bax kənddə - babamgildə

Həyatla ölüm arasında bircə mərtəbə fərq var -

Evin ikinci mərtəbəsi...

Erməni snayperindən yayınmaq üçün

Pilləkənləri qaça-qaça qalxırlar

Orda yaşamırlar - gülləylə yarışırlar

mən də şəhərdə belə keçirəm küçələrdən

Xatirələrdən yayınım deyə...

***

Göyərçinlər yağış gölməçəsindən su içirlərsə

Dəniz olmağın nə mənası var?

***

Bacardığım qədər qısa və lakonik olmağa çalışdım. Amma baxdım ki, Fəridənin şeirlərindən məni tutan nə qədər misra seçə bilmişəm. Hələ bir xeylisi də qaldı. Bu gözəl misralardan sonra uzun-uzadı nə yazasan?! Gənc şairəyə, - bizim Çalıquşuna uğurlar arzulayıram!

• Bu aktrisaya Şimali Kiprdə fəxri doktorluq dərəcəsi veriləcək
• Musiqili Teatrın solisti Qazaxıstanda uğurla çıxış edib
• Kitab sərgisində "Günlərdən şeir"