Ötənlərdə Tik-Tok istifadəçilərindən birinin maşın oğurlayıb qaçdığı xəbəri yayılmışdı.

Xəbərin normal hissəsi bu idi. Anormal hissəsi isə aşağıdakı kimidir:

“Bu şəxs maşını Tik-Tokda video çəkmək üçün oğurlamışdı”.

Ümumiyyətlə, Tik-Tok qədər qəribə, qeyri-adi yer yoxdu. Hamı ordadı – hamı da oranı tənqid edir. Üstəlik, Tik-Tok istifadəçiləri digər sosial şəbəkələrə baxanda daha çox üsyankar görünürlər. Bu üsyankarlıq hansısa haqsızlığa, ədalətsizliyə görə deyil. Tik-tok istifadəçilərinin üsyankarlığı həyata qarşı amansız mübarizə üsuludur. Onlar artıq həyat deyilən “absurd”u zibil yeşiyinə atıb tamamilə öz dünyalarını yaratmaq istəyindədirlər.

Tik-Tok reallıqdır, həyat isə yalan.

Tik-Tok insana pul qazandırır, həyat isə onu müflis edir.

Tik-Tokda məşhurlaşırsan, həyatda isə səni saya salan olmur.

Təzəlikcə bir xəbər də özünü gözlətmədi: Tik-Tokda söyüş söyən biri haqqın rəhmətinə qovuşub.

Deməli, hansısa videoya şərh yazan bu şəxsi söhbətə çağırıblar. Onlar görüş yerində mübahisə ediblər, əlbəyaxa olublar. Nəticədə bıçaq və...

Tik-Tokda yaşamaq sevinci var, həyat isə ölümün tayıdır.

O insan Tik-Tokdan kənara çıxdı və öldü.

Tik-Tokçuların yaratdığı dünyadan kənara çıxdınsa, ölümə məhkumsan.

Nədir bu səviyyəsizliyin, biabırçılığın adı?

Bir yandan ölən üçün kədərə boğulursan...

Bir yandan da deyirsən, ölüm nə ucuz şeymiş...

Hətta Tik-Tok da o ölümü yaradacaq səbəb ola bilərmiş...

İnsanlar dəyişib. Bu sifarişli dəyişiklik insanın daxili dünyasında qeyri-adi bir mənzərə yaradıb.

İnsan XX əsrdə də öldürürdü axı.

İndi də öldürür.

XX əsrdə dueldə öldürürdü.

İndi Tik-Tokdakı söyüşə görə.

Öldürməyin dekoru dəyişsə də, mənası dəyişməyib.

Yenə də Tik-Tokun fenomenliyini unutmayaq.

Tik-Tokun diqtəsini.

Deyəsən, Tik-Tok hələ çox başları yeyəcək.

Nə edək?

Azərbaycan üçün Tik-Toku bağlayaq?

Bəlkə biz doğrudan da Tik-Tokda yox, elə öz reallığımızda yaşamalıyıq.

Yəni biz Tik-Toku yox, həyatı seçməliyik.

Düzü, həyatımız da bir yönnü deyil.

Nəysə...

• Şərqiyyə Hüseynovanın səhhətində problem yarandı
• Türkan Şoraya Kino Fəxri Mükafatı verildi
• Bütün qazancını buna xərcləyir