Nərmin Kamal modeli

Yazarlar

Ana səhifə
Yazarlar

Nərmin Kamal modeli

29 sentyabr 2012

05:00

Kult.az saytında “Terezaya məktub” yazısını oxuyanda canım fəna sıxıldı. Bizim ədəbi mühitin yeni intellektual, ziyalı modelinə ehtiyacı var.

“Ehtiyac var” deyirəm, əslində o model mövcuddur.

O, Nərmin Kamaldır.

Nərmin intellektualdır, istedadlıdır, bir neçə dil bilir, zəhmətkeşdir, istənilən fakta tamamilə fərqli, orijinal münasibəti, maraqlı traktovkaları var və ən əsası, ədəbi mühitin ehtiyac duyduğu, bir çox yazarda olmayan güclü analitik təfəkkürə sahibdir.

Nərmin qalmaqallı ədəbi mühitdə, daha doğrusu, Nərmin ədəbiyyatın olmadığı yerdə yoxdur. O, zahid kimi öz küncünə çəkilib işləyir, bədii əsərlər, elmi məqalələr yazır, tərcüməylə məşğul olur, xarici ədəbi dairələr ilə əlaqələr qurur, konfranslara gedir, ciddi ədəbi təhlillər edir, ictimai məsələlərlə bağlı aydın, cəsarətli, kəskin mövqe bildirir.

Nərmində Avropa insanının rasionallığı, praqmatikliyi var.

İndiyədək Nərminin bir yazısında ədəbi dedi-qodu intonasiyasına, qeyri-ciddi nəyəsə rastlaşmamışam.

Sözügedən yazının ədəbi polemikayla, ədəbiyyatla heç bir əlaqəsi yoxdur. Söhbət əlbəttə ki, konkret bu gənc müəllifdən getmir. Söhbət ədəbi mühitdə analizin, yaradıcılığın yerini tutan dedi-qodu, intellektual polemika mədəniyyətinə malik olmayan infantil düşüncə müəlliflərinin çoxalmasından gedir və dediyim «məqalə nin» müəllifi onların ümumiləşmiş modelidir.

Bu modellərin sayı artır və onların çoxluğu ədəbiyyata ziyandan başqa nəsə vermir.

Daha pis cəhəti, bu modelin “tənqidi”ni arqumentləşdirə bilməməyidir. Bizim tənqid ümumilikdə arqumentləşməyə, təhlil təfəkkürünə möhtacdır.

...Nərmin Kamal bayaq sadaladığım cəhətləri ilə, imici ilə öz ədəbi nəslində unikal adamdır, ədəbi mühit üçün yenidir, nümunədir. Və çox təəssüf ki, bu model ədəbi mühitdə təkdir.

Nərmin Kamal modeli əslində ədəbi mühitdə rəqabətə stimul verməli idi. Artıq XXI əsrdə ədəbiyyatımızda zamanı qabaqlayan başqa alternativ, keyfiyyətli modellər olmalıydı. Amma olmadı.