Yolda oxuduqlarım

Yazarlar

Ana səhifə
Yazarlar

Yolda oxuduqlarım

20 avqust 2012

09:00

İstanbula səfər ərəfəsində Dostoyevskinin həcmcə çox böyük olan “Yeniyetmə” romanını yenicə oxuyub bitirmişdim. A. Radişşevin “Peterburqdan Moskvaya səyahət” kitabını oxumağa başladım və mütaliəm səfər hazırlıqları ucbatından yarımçıq qaldı.

Adətən uzun yola çıxanda çantama bir neçə kitab qoyuram. Bu dəfə David Nikolsun “Bir gün” romanını yolda oxumaq üçün götürdüm və təyyarədə yerimi rahatlayandan sonra əsəri oxumağa başladım. Yenə də mütaliəm yarımçıq qaldı.

İstanbulda həmişə olduğu kimi, kitab mağazalarına da baş çəkdim və xeyli kitab aldım. Nazim Hikmətin bioqrafiyasından bəhs edən “Romantik kommunist” kitabını oteldə oxumağa başladım. Hələ də oxuyub bitirməmişəm.

Səyahət boyunca yeganə oxuyub bitirdiyim kitab ingilis yazarı S. J. Boltonun “Zəhər” romanı oldu. Bu kitabı birnəfəsə oxudum, doğurdan da nəfəskəsici bir həyəcanla oxunur. Əsər baytar həkimi olan bir qadının kənd evlərinə soxulmuş ilanlarla mübarizəsindən bəhs edir. Yarıfantastik, yarıdetektiv, yarımistik elementlərlə süslənmiş bu romanın dilimizə çevrilməsini arzuladım.

Bakıya qayıdanda hava limanında bir-iki saat ərzində A. Radişşevin “Peterburqdan Moskvaya səyahət” əsərini axır ki, oxuyub başa çatdırdım. Təyyarəyə minəndə xanımım dedi ki, səfər boyunca sən ancaq kitab oxudun. Yarızarafat, yarıciddi dedim ki, yaxşı ki, bu kitablar vardı, yoxsa istirahət edə bilməzdim. Qınayıcı nəzərlərlə üzümə baxdı.

Təyyarəyə minəndə kürək çantamda 11 kitab vardı... İkisini özümlə gətirmişdim, doqquzunu isə İstanbuldan almışdım...