Əzrayıl pozub ölüm orucunu...

Yazarlar

Ana səhifə
Yazarlar

Əzrayıl pozub ölüm orucunu...

1 avqust 2012

09:49

Xəbər.

Telefonun gözləri işıqlanır
mesaj: “Keçindi.”
Yenə siqaret yandırırsan
yenə fikrə gedirsən
yenə iç monoloq başlanır...
Demək yenə Əzrayıl
pozub ölüm orucunu
və demək yenə
dolub kiminsə ömür xurcunu...

Neyləməli, taledi,
neyləməli, qədərdi.
Həyat
doğum iliylə ölüm ili arasındakı
balaca bir tire qədərdi.
Qalanı təfərrüatdı,
məzar daşıdı, molladı, güldü,
“mədəni təsərüffatdı”...

İtirəndə anlayırsan
diaqnozların quruluğunu,
dilin ifadə imkanlarını...
“Ürəyi dayandı”
Bu “ürək” adlı ömür avtobusu,
harda dayandı,
hansı dayanacaqda ?
Niyə dayandı,
kimisə götürəcəkmi ?
Bilmirsinizsə, gülməyin.

“Keçindi”
O mərhum zatən
həmişə bizsiz keçinmişdi,
öləndə də bizsiz keçindi...
Halbuki
sayılmışdı, seçilmişdi,
adına sağlıqlar deyilmişdi.
sağlıqların gücü çatmadı əcələ...
Sabah başlamaq lazımdı həyata
heç nə olmamış kimi,
heç nə olmamış kimi,
heç olmamış kimi...