Azərbaycan əsilli iranlı rejissor Məcid Məcidinin "Məhəmməd Peyğəmbər" filminin çəkilişləri başa çatıb. Çəkilişləri üç il davam edən filmdə onun uşaqlıq illərindən peyğəmbərlik missiyasının başlanğıcına kimi dövr əhatə olunub.
Filmin böyük hissəsi İranda lentə alınıb. Bundan başqa çəkiliş heyəti Cənubi Afrika Respublikasının Bela-Bela şəhərində fon üçün bir neçə səhnə çəkib.
Kino layihənin reallaşmasında vizual effektlər üzrə hollivudlu mütəxəssis Skott Anderson, üç dəfə Oskar mükafatçısı, operator Vittorio Storaro da iştirak edib.
Film üçün tarixi materiallar bir il ərzində müxtəlif ölkələrdən – Tunisdən, İraqdan, Livandan, Əlcəzairdən, Mərakeşdən olan alimlərin, tarixçilərin köməyi ilə toplanıb.
Rejissorun “Səma övladları” filmi 1997-ci ildə Oskara nominant olub. "Cənnətin rəngi" isə Amerikada 2000-ci ilin ən yaxşı 10 filmi siyahısına daxil edilib.
35 milyon dollar büdcəsi olan filmin 2015-ci ildə Berlin Kino Festivalında nümayişi planlaşdırılır.
