Və Federikonu öldürdülər... - Antonio Maçadonun şeirləri

Və Federikonu öldürdülər... - Antonio Maçadonun şeirləri
9 aprel 2023
# 15:00

Kulis.az Antonio Maçadonun Federiko Qarsiya Lorkanın ölümünə ithaf olunan şeirlərini təqdim edir.

I

Cinayət

Uzun bir küçəylə gedib

silahlı adamların əhatəsində,

dan sökülürdü yavaş-yavaş,

soyuq idi çöllərdə,

ulduzlar buz bağlamışdı.

Azacıq ağarmışdı göyüzü

və Federikonu öldürdülər.

Cəlladlar qorxaq

və etinasız idi.

"Tanrı köməyin olmasın!" -

dedilər və nəzərlərini yayındırdılar.

Cansız bədəni yerə sərildi Federikonun...

Qan alnından şoruldadı, bədəni soyudu.

Cinayət Qranadada törədildi...

onun Qranadasında!

Xəbərin var bundan, Qranada?

II

Şair ölüm

Uzun bir küçəylə gedib ölümlə yan-yana.

Soyuq idi, amma qorxmurdu soyuqdan.

Deyib: "Gün çıxır və gün işığıyla

oynayır qüllələr,

dəmirçixanada isə çəkic səsləri".

Ölüm ona qulaq asıb sevgili kimi.

O isə deyib ölümə: "Sənin əllərin

ritm tuturdu mənim romanseroma,

sənin orağın cingildəyirdi faciələrimdə.

Əbədi şöhrətləndirəcəyəm

kor gözlərinin baxışını,

cansız bədəninin yüngüllüyünü,

isti dodaqlarıma toxunan soyuq dodaqlarını...

Ey ölüm! Ey nəğmələrimin qaraçısı!

Külək dalğalandırır saçlarını.

Səninləyəm Qranadamın səması altında.

Bizim Qranadamızın. Mənim Qranadamın!"

III

Uzun bir küçəylə gedib...

Ey dirilər, yuxulardan və daşdan

heykəl qoyun ona

Alqambranın fəvvarələri arasında.

Və sular bu sözləri yazsın

qurumayan göz yaşlarıyla:

"Cinayət Qranadada törədildi...

onun Qranadasında!"

Tərcümə: Həmid Piriyev

# 1978 dəfə oxunub

Oxşar xəbərlər

Çexovu yaradan xalq yoxa çıxıb… - Fəxri Uğurlu

Çexovu yaradan xalq yoxa çıxıb… - Fəxri Uğurlu

09:00 10 may 2025
"Mollalıq edirdi, on bir qadını vardı..." - Səməd Vurğunu əks-inqilabçı adlandıran repressiya qurbanı

"Mollalıq edirdi, on bir qadını vardı..." - Səməd Vurğunu əks-inqilabçı adlandıran repressiya qurbanı

09:00 8 may 2025
Himnimizin əsl müəllifi kimdir? - Azər Turan

Himnimizin əsl müəllifi kimdir? - Azər Turan

15:00 5 may 2025
Alverçi, sinəzən, mərsiyəxan Cavid - Bunlar xatirə yox, xətadır!

Alverçi, sinəzən, mərsiyəxan Cavid - Bunlar xatirə yox, xətadır!

12:50 2 may 2025
"Ondan Allahın özü də qorxurdu..." - Mir Cəfər Bağırova yalvaran məşhur yazıçı

"Ondan Allahın özü də qorxurdu..." - Mir Cəfər Bağırova yalvaran məşhur yazıçı

09:00 1 may 2025
Perseyin papağı - Həmid Herisçidən yubiley hekayəsi

Perseyin papağı - Həmid Herisçidən yubiley hekayəsi

12:00 30 aprel 2025
#
#
# # #