Kulis.az Furqanın "Gürcü" hekayəsi haqqında yazıçıların fikirlərini təqdim edir.

İlham Əziz:

"Furqanın hekayəsi çıxan kimi oxumuşam. Onun tezliklə “minanı basdalayacağını” gözləyirəm. Gözləyirəm ki, ürəkdən tikan çıxaran bədii mətni gəlsin. Ümidim çoxdu. Siqnalı gəlir, özü gəlib çıxmır.

Bu hekayəsində də çatışmayan şeylər var. Qurmaq istəyib, düzüb-qoşub, amma atmosfer qatı zəifdi, istənilən tənqid şüası dəlib keçəcək.
Hekayənin dramaturgiyası zəif işlənib.

Con Steynbekin təbirincə desək: "Düstur yalnız yazarın əhəmiyyətli nəsə tapdığı şeyləri oxucuya çatdırma formasında gizlənir. Hekayə təsiredici olmalıdır."
Furqanın hekayəsindəki tapdığı təsiredici şey “əlcək” ola bilər, ancaq əlcəyi mühüm məsələ edən sujet qurmaq lazımdır. Hekayədə işıq var, fəqət zəifdi, öləziyir.

Redaktəyə ehtiyac var. Məsələn, belə bir cümlə oxudum: “Və Rəcəb gələnə qədər liseyin ən yaxşı qapıçısı olan mən hal-hazırda Rəcəbin məndən daha yaxşı qapıda durması ilə barışa bilmirəm”

Yazmaq gözəldi, Furqandan əla mətn gözləyirəm!"

Sevinc Elsevər:

"Sadə, qəşəng hekayədir. Yeniyetmələr də əla oxuyar bunu. Hərçənd dərsliklərə salmağa tərəddüd edərlər. Deyərlər, əhvalatın bəzi hissələri ayaqyolunda bərqərar olur. Bizimkiləri bilirsiniz. Mənim xoşuma gəldi. 12-13 yaşlı uşağın gözüylə oxudum və bəyəndim. Hətta oğlan uşaqlarının gözüylə oxudum. Uğurlar gənc müəllifə!"

Rəvan Cavid:

"Bu hekayə deyil, əhvalatdır. Belə əhvalatları biz hər gün dostlarımıza danışırıq. Bir də, deyəsən, mətn redaktə olunmayıb. İlk abzasda 7 dəfə uduzmaq sözü var. Ümumiyyətlə, təkrarlar yorucudur. Müəllifə uğurlar!"

• “Azərbaycan klassik ədəbiyyatı: dünəndən bu günə” adlı tədbir keçiriləcək
• Antik Roma eksponatı üzərindəki araşdırmalar nəyi üzə çıxardı?
• "Qız, vücudun nədəndir?" - Günün şeiri