“İlan balası” söhbəti

Gənc bir jurnalist Ramiz Rövşnlə müsahibə götürür. İlk sualı belə olur:

- Ramiz müəllim, siz “İlan balası” şerini hansı ilanın balasına yazmısınız?

Şair düşünmədən deyir:

- Çəhrayı ilanın balasına.

- Heç ilanın çəhrayısı da olur?

- Niyə olmur, kişinin “mavisi” ola bilir, ilanın çəhrayısı yox?

Yazıçı ilə oxucunun debatı

Yazıçı Hüseynbala Mirələmovla Fuad Qəhrəmanlı seçki öncəsi televiziyadakı debatda tutaşırlar. Mirələmov deyir:

- Ə, mən bu millət üçün “Xəcalət” boyda povest yazmışam, sən neynəmisən?

Fuad da söz altında qalmır:

- Mən də o povesti oxuyub xeyli xəcalət çəkmişəm...

İşsiz dar ağacı

Rüstəm Behrudi bir gün yenə dar ağacının yanından keçəndə həmişəki kimi ona salam verir. Bu mənzərəni hər gün görən armud ağacı dar ağacından soruşur:

- Bu kişi niyə hər gün burdan keçəndə sənə salam verir?

Dar ağacı armud ağacına deyir:

- Əşi, nə bilim, elə bilir mən hələ də vəzifə başındayam.

Əjdər Olun təəccübü

Şair Əjdər ol AzTV-də “Gülüstan” verilişini aparanda proqramların birinə şair Vahid Əzizi dəvət edir. Vahid Əziz o biri qonaqlardan tez gəlir və gözləmə otağında Əjdər Ol sözgəlişi ondan soruşur:

- Vahid müəllim, bu gün bizə hansı şerinizi oxuyacaqsınız?

- “Qoy işığı söndürüm”.

Əjdər ol təəccüblənir:

- Vahid müəllim, işığı niyə söndürürsünüz?

Qəşəmin telefonu

Qəşəm Nəcəfzadə özünə ilk mobil telefon alır. Tez kontur yükləyib kimə gəldi şeir oxuyur və konturları tezliklə tükənir. İkinci kartı yükləyir, bu da tez qurtarır. Ücüncünü yükləyir və şair Faiq Balabəyliyə zəng edib gileylənir:

- Faiq, təzə telefon almışam, ancaq xarab çıxıb. Deyəsən, konturu korpusa verir.

AYO-çuların cəzası

Dalbadal dörd-beş roman, üç-dörd pyes yazan “Ulduz” jurnalının baş redaktoru Elçin Hüseynbəyli Anarın kabinetinə girib deyir:

- Anar müəllim, dünən təsadüfən AYO-çularla bir məclisə düşmüşdüm.

Anar tez qəlyanına bir qüllab vurub soruşur:

- Afərin, danış görək nə oldu?

- Onlara yenicə yazdığım “Balıq adam” romanımı başdan-ayağacan birnəfəsə oxudum.

- Düz eləmisən, onlara bu da azdı...

• "Rusiyanın qiyaməti qopur" - Çəmənzəminlinin Ukraynadan tarixi müraciəti
• Firuzə İbadovanın səhhətində problem yaranıb
• Daşdan-daşa dəydi başım o zaman - Günün şeiri