Yanmış çölə al qırmızı laləm kimi gəldin... - Xəlil Rza Ulutürk

Yanmış çölə al qırmızı laləm kimi gəldin... - Xəlil Rza Ulutürk
13 sentyabr 2024
# 18:14

Kulis.az "Günün şeiri" layihəsində Xalq şairi Xəlil Rza Ulutürkün Lefortovo zindanında həbsdə olarkən həyat yoldaşına yazdığı "Firəngizin məktubu" şeirini təqdim edir.

Gəldinmi?
Çiçəklərdəki jaləm kimi gəldin,
Zülmətdə bir Ay şöləsi, haləm kimi gəldin.

Ey doğma, əziz məktubu imzalayan əllər,
Ey min yaramın məlhəmi, Loğman, həyan əllər!
Andım kimi, nəğməm kimi, naləm kimi gəldin,
Nur dalğası, eşq allahı, aləm kimi gəldin!

Çəkdim gözümə, gözlərimin şövqü qayıtdı,
Hər cümlən ürəkdə cücərib qol-budaq atdı.
Dar gündə məlakəm gəlib imdadıma çatdı.
Yanmış çölə al qırmızı laləm kimi gəldin,
Nur dalğası, eşq allahı, aləm kimi gəldin.

Mən – odlu cəhənnəm, sən - ətirli, təzə bir meh.
Mən – göy, sən – işıq, qövsi-qüzehlərdəki min zeh.
Mən şeh dilədim, yandı ciyər: bircə ləçək şeh!
Bal şərbəti oldun ki... piyaləm kimi gəldin,
Nur dalğası, eşq allahı, aləm kimi gəldin!

Hər cümləni, hər sətrini, hər cizgini öpdüm,
Yollarda qalan yorğunumu, üzgünü öpdüm,
Xəttin bir işıq güzgüsü, saf güzgünü öpdüm.
Dağdan tökülən yeddi şəlaləm kimi gəldin.
Nur dalğası, eşq allahı, aləm kimi gəldin!

Ey hicrana bais yağı, hicran sənin olsun.
Ey qan tökən ədna əyil, iç, qan sənin olsun.
Mən getsəm, ey ömrüm, al, iki can sənin olsun!
Tutğun komama, məşələ, şöləm kimi gəldin.
Nur dalğası, eşq allahı, aləm kimi gəldin!

Gəldinmi?
Qalıb gülşənim ol, bir də qayıtma!
At qüssəni, meydandakı zər bayrağı atma!
Yumsan gözümü, an Xəlili, qalx, daha yatma!
Ey məktubu qibləm, özü pir, hüsnü iman, din –
Sən ömrümə eşq allahı, yer-göy kimi gəldin.

Qüdrət dağı, qeyrət seli, min candı bu könlüm.
Ey sal qaya, dinlə, yatan ümmandı bu könlüm.
Coşsam, görəcəksən, dəli tufandı bu könlüm,
Sussam, demərəm bəxtimə bir qəm kimi gəldin.
Ölməz, əbədi şairə həmdəm kimi gəldin.

Moskva, Lefortovo zindanı,
10 mart 1990

# 5968 dəfə oxunub

Oxşar xəbərlər

"Göyqurşağını ilmə-ilmə toxuyanı tanıyıram..." - Ullie Kayenin şeiri

"Göyqurşağını ilmə-ilmə toxuyanı tanıyıram..." - Ullie Kayenin şeiri

16:39 17 noyabr 2026
"Yollar bir-birini tanıyırdı hələ..." - Enn Karsonun şeirləri

"Yollar bir-birini tanıyırdı hələ..." - Enn Karsonun şeirləri

11:31 15 noyabr 2026
Tutmuş gözü məni, elə bil çöldə ov tutur - Qəzəllər

Tutmuş gözü məni, elə bil çöldə ov tutur - Qəzəllər

13:47 12 noyabr 2026
"Dostların üzlərini su pərdəsi arxasından görmək..." - Tadeuş Borovskidən "Çayın adları"

"Dostların üzlərini su pərdəsi arxasından görmək..." - Tadeuş Borovskidən "Çayın adları"

12:32 12 noyabr 2026
"Təkcə hissələrinin cəmindən ibarət deyilmiş var olan..." -  Əli Şirin Şükürlünün metamodern şeirləri

"Təkcə hissələrinin cəmindən ibarət deyilmiş var olan..." - Əli Şirin Şükürlünün metamodern şeirləri

15:00 11 noyabr 2026
"Qoy, mən də gəlim səninlə..."  - Yannis Ritsosdan şeirlər

"Qoy, mən də gəlim səninlə..." - Yannis Ritsosdan şeirlər

13:00 11 noyabr 2026
Ana səhifə Reels Yazarlar Xəbərlər