Kulis.az Mətləb Ağanın “...dəyişən heç nə yoxdu” adlı şeirini təqdim edir.
***
...dəyişən heç nə yoxdu,
döngədə on qarış yer;
qaraqabaq fotoqraf,
köhnə foto atelye...
...mənəmmi o fotoda;
hərdən məəttəl qalıram...
...adı nədi bu ömrün,
komediya, ya dram?..
...indi o şəkillərin
üzünə baxmaq olmur...
...vaxt da elə gödəlib,
durub darıxmaq olmur...
”... nədi orda qaralan ,
bayaqdan təkdi orda...
yol üstündə qalmasın;
götür o şəkli ordan...”
