Azərbaycan hərb tarixinin və Qori Müəllimlər Seminariyasının Azərbaycan şöbəsinin araşdırıcısı, yazıçı, publisist, hərbi jurnalist, polkovnik-leytenant Şəmistan Nəzirli bu gün səhər saatlarında Qazaxda ADA Universitetinin Qazax Tədris Mərkəzində keçirilən tədbirdə qəfil vəfat edib.

Kulis.az xəbər verir ki, mərhumun nəşi Qazaxdan Bakıya yola salınıb.

Qeyd edək ki, dəfn yeri və saatı haqqında əlavə məlumat veriləcək.

Şəmistan Nəzirli 1942-ci ildə Qərbi Azərbaycanın Loru nahiyəsinin Yuxarı Körpülü kəndində anadan olub.

1960-cı ildə Dəvəçi şəhərində orta məktəbi bitirib, sonra Bakı texniki-peşə məktəbinə və ADU-nun Jurnalistika fakültəsinə daxil olub. 1962–1965-ci illərdə sovet ordusunda xidmət edib.

Ədəbi fəaliyyətə 1958-ci ildə başlayıb, əsasən Səməd Vurğun və azərbaycanlı sərkərdələrin taleyi mövzularında yazıb. General Əliağa Şıxlinskinin "Xatirələrim" kitabını tərtib edib.

Əmək fəaliyyətinə "Gənc leninçi" qəzetində başlayıb, daha sonra Azərbaycan Dövlət Televiziyası və Radio Verilişlərində, Azərbaycan Dövlət Ensiklopediyasında və Müdafiə Nazirliyində müxtəlif vəzifələrdə çalışıb.

Şəmistan Nəzirli Səməd Vurğun haqqında əsərlərinə görə "Səməd Vurğun fəxri xatirə diplomu" ilə, "Qacarlar" əsərinə görə İran Dostluq Cəmiyyətinin mükafatı ilə, hərbi-publisistik əsərlərinə görə "General Həzi Aslanov" və "General Əliağa Şıxlinski" mükafatları ilə təltif olunub.

2023-cü ildə Azərbaycan Prezidentinin fərdi təqaüdünə layiq görülüb.

• "Yüz ilin tənhalığı"ndan "Əsrin qolu"na - Cənubi Amerika futbolunun magik realizmi
• "Biz bütün səadətimizi dörd gündə yaşadıq..." - "Əcəl zəngi"ndən bir hissə
• Bədən, ruh və zehnin vəhdəti - Yoqa haqqında maraqlı faktlar