Azərbaycan oktyabrın 11-dən 15-dək keçiriləcək Frankfurt Beynəlxalq Kitab Sərgisində təmsil olunacaq.

Mədəniyyət və Turizm Nazirliyin informasiya və ictimaiyyətlə əlaqələr şöbəsindən APA-ya verilən məlumata görə, Azərbaycan mədəniyyətinin, inkişaf edən nəşriyyat-poliqrafiya sahəsinin, kitab sənətinin təmsil və təbliğ olunması məqsədilə Mədəniyyət və Turizm Nazirliyinin əməkdaşlarından və yerli nəşriyyat nümayəndələrindən ibarət nümayəndə heyəti Almaniyanın Frankfurt-Mayn şəhərinə səfər edəcəklər.

Beynəlxalq kitab sərgiləri sırasında Frankfurt Kitab Sərgisi nüfuzu, iştirakçı və ziyarətçi sayının çoxluğu, dünyanın müxtəlif kitab mədəniyyətlərinin görüşü baxımından əlamətdardır.

Mədəniyyət və Turizm Nazirliyi, Azərbaycan Respublikası Diasporla İş üzrə Dövlət Komitəsi və Nizami Gəncəvi Beynəlxalq Mərkəzinin birgə təşkilatçılığı ilə sərgi-yarmarka boyunca bir sıra tədbirlər keçiriləcək.

Oktyabrın 12-də milli pavilyonda "XVIII-XXI əsrlərdə alman dilli Nizamişünasların elmi tədqiqatlarının nəticələri" və "Berlin Dövlət Kitabxanasında qorunan 21 ədəd "Xəmsə" poemalar toplusu qədimi əlyazmalarına çəkilmiş miniatür nümunələrinin tədqiqi" mövzularında məruzələr səsləndiriləcək.

Oktyabrın 13-də isə "Azərbaycan Almanların gözü ilə", "Azərbaycanlılar Almaniyada – diaspor nümayəndələrinin təəssüratları" mövzularında müzakirələr baş tutacaq, Dr. Rahim Şimitin “Mədəniyyətlərarası Təbabət və Kommunikasiya" adlı kitabının təqdimatı keçiriləcək.

• YARAT Müasir İncəsənət Məkanında britaniyalı və bolqar rəssamların sərgiləri açıldı
• “Melodiya” Vaqif Mustafazadənin caz albomunun rəqəmsal versiyasını buraxdı
• Yetim oğlan - Muxtar Auezovun hekayəsi