“İndiyə qədər Azərbaycan Yazıçılar Birliyinin üzvü idim, danışa bilmirdim Birliyin daxilində gedən çoxlu çirkli işləri açıq deyə bilmirdim. Çünki, Birliyin üzvü idim və Birliyi təmsil edirdim. Bu gündən əlimdə olan faktları geniş ictimaiyyətə çatdırmağı özümə borc bilirəm”
Bu sözləri gənc yazar Elşad Barat kulis.az-a açıqlamasında bildirib. O, bu gün Azərbaycan Yazıçılar Birliyindən çıxarılması haqqında öz Facebook səhifəsində məlumat da yayıb: “İndicə eşitdim ki, məni AYB üzvlüyündən çıxarıblar, bu barədə "Ədəbiyyat" qəzetində elan gedib. Yəqin ki, indi Çingiz Abdullayevlə Rəşad Məcid ürəkdən sevinir. Bunların tayları bəşəriyyətin sülh teoremini yazıb Nobel alır, bunlar adi bir gənc yazarı Yazıçılar Birliyindən çıxarıb xoşbəxt olurlar”.
Gənc yazar daha sonra üzvlükdən çıxarılacağını gözləmədiyini deyib: “Belə olacağını gözləmirdim. Ona görə yox ki, hansısa faktları bilirəm, ona görə ki, mən üzvlükdən çıxarılacaq qədər böyük iş görməmişəm. Belə çıxır ki, Yazıçılar Birliyi yazıçıları birləşdirməyə yox, ayırmağa xidmət edir. Orada qruplaşmalar var və iyrənc işlər görülür... Çingiz Abdullayev məni məhkəməyə verib. Mənə maraqlıdır o mənim qarşımda necə dayanacaq? Əlimdə kifayət qədər rəsmi faktlar var. Bəzi məsələlərdə mən də şikayətçi olacağam. Rəşad Məcid, Çingiz Abdullayev və başqa adlar var ki, onları indiyədək mətbuatda çəkmirlər, amma mən hamısını deyəcəyəm. Çünki, mənim deməyə sözüm çoxdur. Məsələn, “Ədalət” qəzetinin dünənki sayında Birliyin mətbuat katibi Xəyal Rza deyir ki, gözümün qabağında Çingiz Abdullayev kitabına görə 30 min dollar qonorar aldı. Mən Xəyal Rzadan soruşmaq istəyirəm: Zəhmət olmasa, bu qonorarı hansı nəşriyyatın hansı kitaba görə verdiyini açıqlasın. Biz də bilək.”
Xatırladaq ki, artıq keçmiş AYB üzvü, gənc yazar Elşad Barat son zamanlar üzvü olduğu birliyi, birlik rəhbərliyini tənqidlərilə gündəmə gəlmişdi.
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
Ana səhifə
Reels
Yazarlar
Xəbərlər