Şabran rayonu "Xaqani" poeziya evində şair- publisist, Prezident mükafatçısı, Beynəlxalq Rəsul Rza mükafatı laureatı Şahnaz Şahinlə görüş keçirilib.

Kulis.az xəbər verir ki, tədbirdə şairin Vətən müharibəsinə həsr olunmuş "Zəfər nəğmələri" və "Şuşa haqqı" kitabları oxuculara təqdim olunub.

Görüşdə şairin qələm dostları və Şabran ziyalıları, eləcə də bir qrup məktəbli iştirak edib.

Tədbiri "Xaqani" Poeziya evinin müdiri şair Aybəniz Əliyar açıb. Əvvəlcə şəhidlərin xatirəsi bir dəqiqəlik sükutla anılıb.

Aybəniz xanım Vətən müharibəsinin tariximizdə böyük rol oynadığından, igidlərimizin böyük şücaətindən danışıb. Şahnaz Şahinin yaradıcılığı haqqında ətraflı söz açan Aybəniz Əliyar bu əsərlərin gələcək nəsillərin tərbiyəsində mühüm rol oynayacağını qeyd edib.

Yazıçı, publisist Kənan Hacı tədbirdə çıxış edərək qeyd edib ki, Qarabağın azad edilməsi ilə xalqın ən böyük arzusu həyata keçib. Bu parlaq qələbəni əks etdirən bir çox əsərlər yazılıb. Şahnaz Şahinin "Zəfər nəğmələri" və "Şuşa haqqı" bu mövzuda yazılmış dəyərli əsərlərdəndir.

Tanınmış qələm adamları Gülayə Könül, Günel Natiq, İlhamə Dağlı Şahnaz Şahinin yaradıcılığı haqqında fikirlərini bölüşərək şairin Vətən muharibəsini əks etdirən kitablarının bədii dəyərindən söz açıblar.

Daha sonra Şabran MKS-nin direktoru Firəngiz Aslanova, yerli şairlər Gülnar Zakirqızı, Qızqayıt Mahmudova və başqa iştirakçılar çıxış edərək fikirlərini bölüşüblər.

Daha sonra məktəblilərin Şahnaz Şahinin əsərlərindən söylədiyi nümunələr maraqla dinlənilib.

Tədbirin sonunda xatirə şəkilləri çəkilib.

• Adların alın yazısı - Anar Aminin şeiri
• Livan və Qəzza ingilisin kətanında
• Pianoçumuz Londonda solo konsert verib