Azərbaycanın Özbəkistandakı səfirliyinin nəzdində fəaliyyət göstərən Heydər Əliyev adına Azərbaycan Mədəniyyət Mərkəzi, Özbəkistan Respublikasının “Hunarmand” Assosiasiyası və Özbəkistan Dövlət Tətbiqi Sənət Muzeyinin birgə təşkilatçılığı ilə “Naxışların dili – ortaq mirasın səsi” adlı üçgünlük tədbirlər çərçivəsində adıçəkilən muzeydə “Ornamentlərdə kodlaşmış mədəniyyət” mövzusunda konfrans keçirilib.

Mərkəzdən kulis.az-a bildirilib ki, tədbirdə çıxış edən Mədəniyyət Mərkəzinin direktoru Akif Marifli qeyd edib ki, konfrans yalnız mədəni hadisə deyil, eyni zamanda, Azərbaycan və özbək xalqları arasında əsrlər boyu formalaşmış dostluq və qarşılıqlı hörmət münasibətlərinin təzahürüdür. O bildirib ki, bu cür təşəbbüslər iki ölkə arasında mədəni-humanitar əlaqələrin daha da möhkəmlənməsinə xidmət edir.

Özbəkistan Dövlət Tətbiqi Sənət Muzeyinin direktoru İsmat Yusupov bu kimi tədbirlərin həm Daşkənddə, həm də gələcəkdə Bakıda keçirilməsinin ölkələrimiz arasında münasibətlərin daha da genişlənməsinə töhfə verəcəyini bildirib.

Özbəkistan Respublikasının “Hunarmand” Assosiasiyasının bölmə müdiri Jamshid Tilakov isə qeyd edib ki, belə layihələr sənətkarlar arasında təcrübə mübadiləsinin genişlənməsi və milli sənət ənənələrinin qorunması baxımından mühüm əhəmiyyət daşıyır.

Konfrans çərçivəsində Azərbaycanı təmsil edən sənətkarların təqdimatları da dinlənilib. Xalçaçı rəssam Ağasadıq Süleymanov “Miniatür və Azərbaycan” mövzusunda çıxış edərək milli miniatür sənətinin formalaşma mərhələləri, ornament sistemi və klassik bədii ənənələrlə əlaqələri barədə ətraflı məlumat verib.

Battal ebru texnikası üzrə sənətkar Sevinc Əliyeva “Su üzərində kodlaşmış tarix” mövzusunda təqdimatında bu sənətin yaranma tarixi, texniki xüsusiyyətləri və Şərq mədəniyyətindəki yeri haqqında danışıb.

Keramika ustası Ruhəngiz Bağırova isə “Azərbaycanın qədim dövr dulusçuluq sənəti” mövzusunda çıxış edərək qədim keramika ənənələri, istifadə olunan texnologiyalar və bədii xüsusiyyətlər barədə məlumat verib.

Konfransda çıxış edən özbək sənət ustaları Nasiba Satiboldiyeva, Bibisora Rahmatullayeva və digər iştirakçılar da milli sənət ənənələrinin xüsusiyyətlərini təqdim ediblər.

• "Danışıram ulduzlara, bir səs vermirlər..." - Yapon şairdən haykular
• Tanınmış bəstəkar vəfat etdi
• Vüqar Əli: "Rəssam niyə acından ölməlidir?" - Müsahibə